ময়ূৰ বৰা
| ময়ূৰ বৰা | |
|---|---|
 | |
| জন্ম | ১০ জুন, ১৯৭০ (৫৪ বছৰ) নগাঁও, অসম |
| ভাষা | অসমীয়া |
| ৰাষ্ট্ৰীয়তা | ভাৰতীয় |
| নাগৰিকত্ব | ভাৰতীয় |
| শিক্ষা | স্নাতক (বুৰঞ্জী), দিল্লী বিশ্ববিদ্যালয় |
| বিষয় | লেখক, সমালোচক |
| উল্লেখনীয় কৰ্মৰাজি | চিৰদিন অসমীয়া |
| আত্মীয়-স্বজন | ভাৰত চন্দ্ৰ বৰা (পিতৃ), বনলতা বৰা (মাতৃ) |
ময়ূৰ বৰা (ইংৰাজী: Mayur Bora; জন্ম: ১৯৭০) এজন অসমীয়া লেখক, চিন্তাবিদ আৰু সমালোচক। একবিংশ শতিকাৰ প্ৰথম দশকত বাতৰিকাকত আৰু আলোচনীৰ মাধ্যমেৰে প্ৰবন্ধ ৰচনাৰ দ্বাৰা সাহিত্যকৰ্মক সমৃদ্ধ কৰা অসমীয়া নতুনচাম লেখকৰ ভিতৰত এজন ময়ূৰ বৰা।[1] তেওঁ যুৱসমাজত ইতিবাচক বাৰ্তা প্ৰেৰণকাৰী সাহিত্য সৃষ্টিৰ বাবে ২০১৬ চনত কৰ্মবীৰ চন্দ্ৰনাথ শৰ্মা বঁটা,[2] ২০১৭ চনত অসম সাহিত্য সভাৰ ভৰত চন্দ্ৰ বৰুৱা স্মাৰক বঁটা,[2] ২০১৮ চনত মইদুল ইছলাম বৰা সাহিত্য বঁটা [3] আৰু ২০২২ চনত জননেতা ভীমবৰ দেউৰী বঁটা[4] আৰু ২০২৩ চনত নিউজ হেল্থ প্লাছে প্ৰদান কৰা ‘শ্ৰেষ্ঠ দ্বিভাষিক বক্তা’ৰ সন্মান লাভ কৰিছে।
জন্ম আৰু শিক্ষা
[সম্পাদনা কৰক]ময়ূৰ বৰাৰ জন্ম হৈছিল ১৯৭০ চনৰ ১০ জুন তাৰিখে নগাঁও জিলাত। পিতৃৰ নাম ভাৰত চন্দ্ৰ বৰা আৰু মাতৃৰ নাম বনলতা বৰা। তেওঁৰ ককাক সনতৰাম বৰা[5] শ্ৰীমন্ত শঙ্কৰদেৱ সঙ্ঘৰ প্ৰথমজন সম্পাদক আছিল। আইতাকৰ নাম কিৰণবালা বৰা।[6][3]
গুৱাহাটীত ডাঙৰ দীঘল হোৱা ময়ূৰ বৰাই[1] প্ৰাথমিক শিক্ষা লাভ কৰে গুৱাহাটীৰ চানমাৰিৰ চেক্ৰেট হাৰ্ট নামৰ স্কুলৰ পৰা। পৰৱৰ্তী সময়ত তেওঁ সেই স্কুল এৰি ব্যক্তিগত কাৰণত নিজৰাপাৰ প্ৰাথমিক বিদ্যালয়ত নাম ভৰ্তি কৰেহি। তাৰ পাছত তেওঁ গুৱাহাটীৰ কলেজিয়েট স্কুলৰ পৰা মাধ্যমিক শিক্ষা লাভ কৰে। ১৯৮৭ চনত কটন কলেজিয়েট স্কুলৰ পৰা মেট্ৰিক পৰীক্ষা পাছ কৰে। তাৰ পাছত কটন কলেজৰ বিজ্ঞান শাখাত নামভৰ্তি কৰে।[6] ১৯৮৯ চনত উচ্চতৰ মাধ্যমিক সাং কৰাৰ পিছত তেওঁ তেওঁ দিল্লী বিশ্ববিদ্যালয়ত বুৰঞ্জী বিষয়ক সন্মানীয় বিষয় হিচাপে লৈ ১৯৯৩ চনত স্নাতক ডিগ্ৰী গ্ৰহণ কৰে। ডিগ্ৰীত দৰ্শন তেওঁৰ পাছক'ৰ্ছ আছিল।[3]
কৰ্মজীৱন
[সম্পাদনা কৰক]ট্ৰান্সমিছন একজেকিউটিভ পৰীক্ষাত অসমৰ ভিতৰতে তেওঁ প্ৰথম হৈ আকাশবাণী হাফলঙত চাকৰি পাইও যোগদান কৰা নাছিল।[3] তেওঁ ১৯৯৬ চনত সৰ্বভাৰতীয় পৰ্যায়ৰ পৰীক্ষাত সুখ্যাতিৰে উত্তীৰ্ণ হৈ লক্ষ্ণৌস্থিত ৰাষ্ট্ৰীয় কৃষি আৰু গ্ৰামীণ বিকাশ বেংকৰ কাৰ্যালয়ত[2] সহকাৰী প্ৰবন্ধক (Assistant Manager) হিচাপে চাকৰি জীৱনৰ পাতনি মেলে।[6] তাত কেইমাহমান চাকৰি কৰাৰ পিছত তেওঁ গুৱাহাটীৰ কাৰ্যালয়লৈ আহে আৰু ১৯৯৬ চনৰ পৰা ২০০৩ চনলৈকে সহকাৰী প্ৰবন্ধক হিচাপে কাম কৰে। ইয়াৰ পিছত ২০০৩ চনৰ পৰা ২০০৭ চনলৈ চণ্ডীগড় আৰু ২০০৭ চনৰ পৰা ২০১৫ চনলৈকে যোৰহাটত তেওঁ কৰ্মজীৱন অতিবাহিত কৰে। ২০১৫ চনৰ পৰা ২০১৯ চনলৈকে নাবাৰ্ডৰ পৰা ডেপুটেচন হিচাপে তেওঁ গুৱাহাটীৰ খানাপাৰাত থকা ইণ্ডিয়ান ইনষ্টিটিউট অব বেংক মেনেজমেণ্ট (আই আই বি এম) ত চাৰি বছৰ ফেকাল্টি মেম্বাৰ হিচাপে সেৱা আগবঢ়ায়। ২০১৯ চনত তেওঁ পুনেত অৱস্থিত মহাৰাষ্ট্ৰৰ ৰিজনেল অফিচৰ উপ-মহাপ্ৰবন্ধক (Deputy General Manager) পদত কৰ্মৰত হয় আৰু ২০২১ চনৰ মাৰ্চ মাহত স্বেচ্ছামূলক অৱসৰ গ্ৰহণ কৰে।[1]
সাহিত্যিক-সামাজিক জীৱন
[সম্পাদনা কৰক]কটন কলেজত পঢ়ি থকা সময়তে ময়ূৰ বৰাই দ্যা ছেণ্টিনেল কাকতত প্ৰবন্ধ লিখিবলৈ আৰম্ভ কৰে। অৱশ্যে ষষ্ঠ শ্ৰেণীত পঢ়ি থাকোঁতেই তেওঁৰ প্ৰথম লেখা প্ৰকাশ হয় ভবেন্দ্ৰ নাথ শইকীয়াৰ দ্বাৰা সম্পাদিত সঁফুৰা আলোচনীত। তাত ময়ূৰ বৰাই অসমৰ পণ্ডিত আনন্দৰাম বৰুৱাৰ বিষয়ে লেখা এটা লিখিছিল।[1][6] ষষ্ঠ শ্ৰেণীৰ পৰা তেওঁ অসম বাণী আৰু প্ৰহৰীত লিখিছিল। কটন কলেজত পঢ়ি থকাৰ সময়ত তেওঁ ইংৰাজীত প্ৰবন্ধ লিখিবলৈ আৰম্ভ কৰে।[1] তেওঁ পশ্চিমীয়া সংস্কৃতি, জাতিবাদৰ ওপৰত হোৱা বিতৰ্কত আগ্ৰহ প্ৰকাশ কৰিছিল আৰু তেওঁ ডিডি নেচনেলত 'লোহিত কিনাৰে' শীৰ্ষক এখন টিভি ধাৰাবাহিক নিৰ্মাণ কৰোঁতে ভূপেন হাজৰিকাৰ অযৌক্তিক সমালোচনাৰ বিৰুদ্ধে সজোৰে প্ৰতিবাদ কৰিছিল।[3][2]
ধৰ্মীয় আৰু সামাজিক দিশত চলি থকা ভণ্ডামি, অন্ধবিশ্বাস, জাতিবাদ প্ৰথা, আৰু সামগ্ৰিকভাৱে অসমৰ জ্বলন্ত সমস্যা তথা সাম্প্ৰতিক সময়ৰ দুৰ্নীতি আদি তেওঁৰ লেখাৰ মূল বিষয়বস্তু। প্ৰথাগত চিন্তা আৰু ধাৰণাৰ বিৰুদ্ধে যুক্তিনিষ্ঠ প্ৰশ্ন উত্থাপন, জাতিৰ ঐতিহ্যৰ প্ৰতি দায়বদ্ধতা।[7] আৰু ঐতিহাসিক সমলৰ সন্ধান আদি বৈশিষ্ট্যবোৰো ময়ূৰ বৰাৰ প্ৰবন্ধৰ অন্যতম শক্তি।[6]। বৰ্তমানলৈকে তেওঁ সৰ্বমুঠ ১৮খন গ্ৰন্থৰ লেখক।[1][8] ১৬খন অসমীয়া গ্ৰন্থৰ লগতে তেওঁ দুখন গ্ৰন্থ ইংৰাজী ভাষাত ৰচনা কৰা। তেওঁ ইংৰাজীলৈ এখন গল্প সংকলন অনুবাদ কৰিছে। দিলীপ বৰাৰ চুটিগল্পৰাজি 'All Those Yearings' নামেৰে ইংৰাজীলৈ অনুবাদ কৰে।[1]
অসমীয়াত লিখা-মেলা কৰিবলৈ আৰম্ভ কৰা ময়ূৰ বৰাক দেউতাকে ইংৰাজী ভাষা শিক্ষাতো গুৰুত্ব দিছিল। সেয়ে অসমীয়াৰ সমান্তৰালকৈ ইংৰাজীতো ময়ূৰ বৰাৰ দক্ষতা পৰিলক্ষিত হয়।[1] তেওঁ প্ৰথম দ্যা আছাম ট্ৰিবিউন কাকত নিয়মীয়াকৈ লিখিছিল।[3] সাহিত্য ৰচনাৰ লগতে তেওঁ বহু ৰাজহুৱা বক্তৃতাও প্ৰদান কৰিছে। তেখেতে অসমৰ বিশ্ববিদ্যালয়, মহাবিদ্যালয়সমূহৰ লগতে বহিঃৰাজ্যৰো বিভিন্ন অনুষ্ঠানত বক্তৃতা দিবলৈ আমন্ত্ৰিত হোৱাৰ লগতে অসমত বহুকেইটা স্মাৰক বক্তৃতা প্ৰদান কৰিছে।[1] তাৰে কেইটামান স্মাৰক বক্তৃতা হৈছে, ২০১৭ চনৰ ৬ আগষ্টত গুৱাহাটীৰ তীৰ্থনাথ শৰ্মা ভৱনত 'পুষ্পলতা দাস স্মাৰক বক্তৃতা' (বিষয়- জাতিৰ গৌৰৱ বৃদ্ধিত অসমীয়া নাৰীৰ ভূমিকা), ২০১৭ চনৰ ২৩ আগষ্টত তেজপুৰ কেন্দ্ৰীয় বিশ্ববিদ্যালয়ৰ সংস্কৃতি অধ্যয়ন বিভাগে শ্ৰীমন্ত শঙ্কৰদেৱৰ ৪৪৮ তম মৃত্যুতিথিত আয়োজন কৰা 'বিশেষ বক্তৃতা' (বিষয়: শ্ৰীমন্ত শঙ্কৰদেৱ), ২০১৮ চনৰ ২ জানুৱাৰীত গুৱাহাটীৰ তীৰ্থনাথ শৰ্মা ভৱনত 'অসম কেশৰী অম্বিকাগিৰী ৰায়চৌধুৰী স্মাৰক বক্তৃতা' (বিষয়-অম্বিকাগিৰীৰ স্বাভিমান আৰু সাম্প্ৰতিক অসমীয়া সমাজ), ২০১৮ চনৰ ২৪ মে'ত গুৱাহাটীৰ শ্ৰীমন্ত শংকৰদেৱ কলাক্ষেত্ৰৰ শ্ৰীশ্ৰী মাধৱদেৱ প্ৰেক্ষাগৃহত 'পদ্মলোচন ভূঞা স্মাৰক বক্তৃতা' (বিষয়-অসমীয়া জাতিৰ উত্তৰণ-সমস্যা আৰু সম্ভাৱনীয়তা), ২০১৮ চনৰ ১৯ নবেম্বৰত তেজপুৰ কেন্দ্ৰীয় বিশ্ববিদ্যালয়ত 'ড॰ মাধৱ চন্দ্ৰ বৰা স্মাৰক বক্তৃতা' (বিষয়-পৰিৱৰ্তনশীল বিশ্বত পৰিৱৰ্তনশীল মানসিকতা), ২০১৯ চনৰ ১০ নবেম্বৰত গুৱাহাটীৰ শ্ৰীমন্ত শংকৰদেৱ কলাক্ষেত্ৰৰ নীলমণি ফুকন প্ৰেক্ষাগৃহত'যোগেন্দ্ৰ নাৰায়ণ ভূঞা স্মাৰক বক্তৃতা' (বিষয়-যোগেন্দ্ৰ নাৰায়ণ আৰু ঊনবিংশ শতিকাৰ অসম) ইত্যাদি।
পিতৃ-মাতৃয়ে ময়ূৰ বৰাক সৰুৰ পৰাই সমাজত কঠিন প্ৰশ্ন কৰিবলৈ শিকাইছিল। এই অভ্যাসে সাহিত্য চৰ্চাত ইতিবাচক প্ৰভাৱ পেলাইছিল বুলি ময়ূৰ বৰাই কয়। তেখেতৰ ভাষাত, "পিতৃ-মাতৃৰ প্ৰভাৱে মোক পঢ়িবলৈ, কৌতূহলী হ'বলৈ আৰু প্ৰশ্ন সুধিবলৈ আগ্ৰহী কৰি তুলিছিল। দেউতাই মোক সদায়ে কৈছিল মানৱ সভ্যতাৰ ভেটি সদায় শক্তিশালী অনুসন্ধানৰ ওপৰত নিৰ্ভৰ কৰে। (Parental influence played a great role in making me pick up interest in reading, in being curious and in always asking questions. My father always used to say that the edifice of human civilisation always rests on a sense of robust inquiry.)"[1]
ময়ূৰ বৰা দূৰদৰ্শনৰ বিভিন্ন আলোচনা-তৰ্ক আদিত আমন্ত্ৰিত হয় আৰু তেওঁ সিবিলাকত সক্ৰিয় ভূমিকা গ্ৰহণ কৰে।[3]
২০২১ চনৰ ৪ জুলাইত কানাডাত উত্তৰ আমেৰিকাৰ অসম এছ'চিয়েশ্বনৰ বাৰ্ষিক অধিৱেশন উপলক্ষে অনুষ্ঠিত হোৱা সঁতাৰ সভাত ময়ূৰ বৰাই ইতিহাসলভ্য শিক্ষা আৰু অসমীয়া জাতিৰ ভৱিষ্যৎ শীৰ্ষক এলানি বক্তৃতা প্ৰদান কৰে। এই বক্তৃতাত ময়ূৰ বৰাই কৈছিল,"প্ৰবাসীসকল এটা নিঃসংগ দ্বীপ নহয়, তেওঁলোক একো একোটা তৰা বা নক্ষত্ৰ।" লগতে তেওঁ উল্লেখ কৰিছিল যে অসমীয়া অভিভাৱকে যেতিয়া নিজৰ সন্তানে অসমীয়া নাজানে বুলি কয়-তেতিয়া তেওঁলোকক সন্মান সহকাৰে সোঁৱৰাই দিবৰ মন যায় এলিজা ব্ৰাউনৰ কথা, যি সাত সাগৰ তেৰ নদীৰ সিপাৰৰ পৰা আহি অসমীয়া শিকি, অৰুণোদয় আলোচনীৰ নামটোও দিছিল।" [9][10]
ব্যক্তিগত জীৱন
[সম্পাদনা কৰক]১৯৯৯ চনৰ ৫ ফেব্ৰুৱাৰীত ময়ূৰ বৰাৰ ৰঞ্জিতা বৰাৰ সৈতে বিবাহ হয়। তেওঁলোকৰ দুজন সন্তান আছে। এজন ল'ৰা আৰু এগৰাকী ছোৱালী। ল'ৰাটোৰ নাম দেৱাস্মিত বৰা আৰু ছোৱালীজনীৰ নাম প্ৰাচীতা বৰা।
সাহিত্যকৰ্ম
[সম্পাদনা কৰক]
|
|
প্ৰাপ্ত সন্মান
[সম্পাদনা কৰক]- ২০১৬ চনত কৰ্মবীৰ চন্দ্ৰনাথ শৰ্মা বঁটা[2][1]
- ২০১৭ চনত অসম সাহিত্য সভাৰ ভৰত চন্দ্ৰ বৰুৱা স্মাৰক বঁটা[2][1]
- ২০১৮ চনত মইদুল ইছলাম বৰা সাহিত্য বঁটা[11][1]
- ২০২২ চনত জননেতা ভীমবৰ দেউৰী বঁটা [12]
- ২০২৩ চনত নিউজ হেল্থ প্লাছৰ ‘শ্ৰেষ্ঠ দ্বিভাষিক বক্তা’ৰ সন্মান
তথ্যসূত্ৰ
[সম্পাদনা কৰক]- ↑ 1.00 1.01 1.02 1.03 1.04 1.05 1.06 1.07 1.08 1.09 1.10 1.11 1.12 "This award-winning Assam writer is unravelling history, illuminating the future". 25 July, 2021. https://www.eastmojo.com/assam/2021/07/25/this-award-winning-assam-writer-is-unravelling-history-illuminating-the-future/। আহৰণ কৰা হৈছে: 1 August 2021.
- ↑ 2.0 2.1 2.2 2.3 2.4 2.5 "Meet Mayur Bora- the acclaimed writer with 14 books to his credit" (en ভাষাত). Guwahati Plus. https://www.guwahatiplus.com/article-detail/meet-mayur-bora-the-acclaimed-writer-with-14-books-to-his-credit। আহৰণ কৰা হৈছে: 28 September 2018.
- ↑ 3.0 3.1 3.2 3.3 3.4 3.5 3.6 "Mayur Bora: A true scholar of Assam with moral values". 1 August 2021. https://nenow.in/opinion/mayur-bora-a-true-scholar-of-assam-with-moral-values.html। আহৰণ কৰা হৈছে: 2 August 2021.
- ↑ "Mayur Bora Conferred with Jananeta Bhimbar Deori Bota". The Assam Tribune. 2 December, 2022.
- ↑ ময়ূৰ বৰা (জানুৱাৰী, ২০১২). পথভ্ৰষ্ট হৈছে নেকি শংকৰ সংঘ. আঁক-বাক.
- ↑ 6.0 6.1 6.2 6.3 6.4 সম্পাদনা-ডিম্পল চমুৱা (2015-16). নৰ্থ লখিমপুৰ কলেজ আলোচনী. পৃষ্ঠা. 95.
- ↑ "বিশিষ্ট লেখক, চিন্তাবিদ ময়ূৰ বৰাৰ চতুৰ্দশ গ্ৰন্থ ‘অসমীয়া স্বাভিমানৰ ৰূপৰেখা’ উন্মোচন". North east now. 10 dec, 2017. https://assam.nenow.in/%e0%a6%ac%e0%a6%bf%e0%a6%b6%e0%a6%bf%e0%a6%b7%e0%a7%8d%e0%a6%9f-%e0%a6%b2%e0%a7%87%e0%a6%96%e0%a6%95-%e0%a6%9a%e0%a6%bf%e0%a6%a8%e0%a7%8d%e0%a6%a4%e0%a6%be%e0%a6%ac%e0%a6%bf%e0%a6%a6-%e0%a6%ae/। আহৰণ কৰা হৈছে: 21 July 2021.
- ↑ বৰা, ময়ূৰ (২০২০). কিছু ইতিবাচক চিন্তাৰে ময়ূৰ বৰা. অৰ্চনা বৰঠাকুৰৰ সৈতে সাক্ষাৎকাৰ. Archana's Let us talk. https://www.youtube.com/embed/dGjuEwDa6d4.+Guwahati.
- ↑ দেবাঞ্জন বৰঠাকুৰ (১ আগষ্ট,২০২১). "উত্তৰ আমেৰিকাৰ অসমীয়া সমাজ আৰু এটি আকৰ্ষণীয় ভাষণ". সাদিন.
- ↑ "মিছিছিপিৰ পাৰত আই অসমীৰ সুৱদী মাত". আমাৰ অসম. ২৪ জুলাই,২০২১.
- ↑ "Critic and Writer Mayur Bora to Receive Dr Maidul Islam Bora Memorial Award" (en ভাষাত). The Sentinel. https://www.sentinelassam.com/north-east-india-news/assam-news/critic-and-writer-mayur-bora-to-receive-dr-maidul-islam-bora-memorial-award/। আহৰণ কৰা হৈছে: 10 August 2018.
- ↑ "আৰ্কাইভ কপি". নিয়মীয়া বাৰ্তা: পৃষ্ঠা ৯. ১ ডিচেম্বৰ,২০২২. Archived from the original on 1 December 2022. https://web.archive.org/web/20221201164646/https://niyomiyabarta.com/epaper/01122022/page9.php। আহৰণ কৰা হৈছে: 1 December 2022.