জন্‌ছ মহলীয়া

অসমীয়া ৱিকিপিডিয়াৰ পৰা
Jump to navigation Jump to search
জনছ মহলীয়া
জন্ম ২৬ ছেপ্টেম্বৰ, ১৯৪৬
চতিয়া, অসম
মৃত্যু ৫ ফেব্ৰুৱাৰী, ২০১৬
গুৱাহাটী, অসম
ৰাষ্ট্ৰীয়তা ভাৰত ভাৰতীয়
পেচা চলচ্চিত্ৰ প্ৰযোজক, পৰিচালক

জন্‌ছ মহলীয়া (২৬ ছেপ্টেম্বৰ, ১৯৪৬- ৫ ফেব্ৰুৱাৰী, ২০১৬) অসমৰ এগৰাকী চলচ্চিত্ৰ নিৰ্মাতা। শোণিতপুৰ জিলাৰ চতিয়াৰ চেঙামাৰীত জন্মগ্ৰহণ কৰা মহলীয়াই পুণেৰ 'ফিল্ম এণ্ড টেলিভিছন ইন্‌ষ্টিটিউট ইণ্ডিয়া'ত নিৰ্দেশনাৰ পাঠ্যক্ৰম গ্ৰহণ কৰিছিল। ১৯৭৯ চনত মুক্তি লাভ কৰা "দূৰণিৰ ৰং" তেখেতৰ প্ৰথম চলচ্চিত্ৰ। তেখেতে "নতুন বেলি" নামৰ এখন শিশু আলোচনী সম্পাদনা কৰি উলিয়াইছিল। দীৰ্ঘদিন ধৰি বৃক্কৰ ৰোগত ভুগি থকা মহলীয়াই ২০১৬ চনৰ ৫ ফেব্ৰুৱাৰীত গুৱাহাটীৰ এখন ব্যক্তিগত চিকিৎসালয়ত মৃত্যুবৰণ কৰে।

প্ৰাৰম্ভিক জীৱন আৰু শিক্ষা[সম্পাদনা কৰক]

জন্‌ছ মহলীয়াই ১৯৪৬ চনৰ ২৬ ছেপ্টেম্বৰত শোণিতপুৰ জিলাৰ চতিয়াৰ চেঙামাৰীত জন্মগ্ৰহণ কৰে। তেখেতৰ পিতৃ ভূঞা মহলীয়া আৰু মাতৃ নুমলী মহলীয়া।[1] চেঙামাৰীতে স্কুলীয়া শিক্ষা গ্ৰহণ কৰি তেখেতে তেজপুৰৰ পৰা উচ্চতৰ মাধ্যমিক শিক্ষা সাং কৰে। তাৰ পাছত গুৱাহাটীৰ আৰ্য মহাবিদ্যালয়ৰ পৰা স্নাতক শিক্ষা লাভ কৰে। তেজপুৰত থাকোঁতেই মহলীয়া সাংস্কৃতিক ক্ষেত্ৰৰ লগত জড়িত হৈ পৰে। ছাত্ৰাৱস্থাত বন্ধুবৰ্গৰ মাজত তেখেতে যাদুকলাও প্ৰদৰ্শন কৰিছিল।

স্নাতক ডিগ্ৰী লাভ কৰাৰ পাছত তেখেত পুণেৰ 'ফিল্ম এণ্ড টেলিভিছন ইন্‌ষ্টিটিউট ইণ্ডিয়া'ত নিৰ্দেশনা বিষয় অধ্যয়ন কৰিবলৈ যায়। তাত চূড়ান্ত বৰ্ষত পাঠ্যক্ৰমৰ অংশ হিচাপে "দূৰ চলে" নামৰ এখন চিটি ছবি পৰিচালনা কৰিছিল। ১৯৭১ চনত তেখেতে নিদেশনাৰ স্নাতক ডিগ্ৰী লাভ কৰে।[2] ১৯৭৩ চনত ৰীতা মহলীয়াৰ লগত তেখেতৰ বিবাহ সম্পন্ন হয়।

কৰ্মজীৱন[সম্পাদনা কৰক]

তেজপুৰলৈ ঘূৰি আহি মহলীয়াই ব্যৱসায়ত মনোনিবেশ কৰে। ইয়াৰ মাজতে ৰূপায়ণ ক্লাবৰ বেনাৰত নৰেন লহকৰৰ ৰচনাৰে "অক্টোপাছ আলিংগন" নামৰ এখন চুটি ছবি নিৰ্মাণ কৰে।[3] তাৰ পাছত গুৱাহাটীলৈ আহি নৱাৰুণ ফিল্ম্‌ছৰ বেনাৰত "দূৰ চলে"ৰ আৰ্হিৰে "দূৰণিৰ ৰং" নামৰ এখন চলচ্চিত্ৰ নিৰ্মাণ কৰিবলৈ লয়। এই সময়ত তেখেতে দূৰদৰ্শন কেন্দ্ৰৰ ফিল্ম ডিভিজনৰ পৰিচালকৰ চাকৰি লাভ কৰাত চলচ্চিত্ৰৰ কাম আধাতে এৰে। ফিল্ম ডিভিজন থাকোঁতে তেখেতে ৯ খন বিভাগীয় তথ্যচিত্ৰ নিৰ্মাণ কৰে।[2] কিন্তু চলচ্চিত্ৰৰ মোহ এৰিব নোৱাৰি তেখেতে চাকৰি এৰি বোলছবি নিৰ্মাণত ধৰে। ১৯৭৯ চনত তেখেতৰ পৰিচালনাৰে "দূৰণিৰ ৰং" ছবিখনে মুক্তি লাভ কৰে। অসম আন্দোলনৰ সময়ত মুক্তি দিয়া ছবিখন বাণিজ্যিকভাৱে ব্যৰ্থ হোৱাৰ লগতে মহলীয়া অৰ্থ-সংকটত ভোগে।[3]

ইয়াৰ পাছতো মহলীয়াই কেইবাখনো অসমীয়া চলচ্চিত্ৰ নিৰ্মাণ কৰিছিল। তেখেতে গুৱাহাটী দূৰদৰ্শনৰ বাবে কেইবাখনো জনপ্ৰিয় ধাৰাবাহিকো পৰিচালনা কৰিছিল। দিল্লীত অনুষ্ঠিত "এছিয়া ৭২" সমাৰোহত তেখেতে তিনিখন তিনি মিনিটৰ চুটি ছবিৰে উত্তৰ-পূব ভাৰতক অকলে প্ৰতিনিধিত্ব কৰিছিল।

ইয়াৰ বাহিৰে জন্‌ছ মহলীয়াই "নতুন বেলি" নামৰ এখন শিশু আলোচনী সম্পাদনা আৰু প্ৰকাশ কৰিছিল।[3]

মৃত্যু[সম্পাদনা কৰক]

বহুদিনৰ পৰা বৃক্কৰ অসুখত ভুগি থকা মহলীয়াক ২০১৬ চনৰ ২৫ জানুৱাৰীত গুৱাহাটীৰ হায়াট চিকিৎসালয়ত ভৰ্তি কৰোৱা হয়। ইয়াতে ৫ ছেপ্টেম্বৰৰ সন্ধিয়া ৫:৫০ বজাত ৭০ বছৰ বয়ত তেখেতৰ মৃত্যু হয়। মৃত্যুৰ সময়ত জন্‌ছ মহলীয়াই পত্নী ৰীতা মহলীয়া, জীয়ৰী জিনি মহলীয়া, পুত্ৰ জেৰী মহলীয়া প্ৰমুখ্যে আত্মীয়-স্বজনক ইহসংসাৰত এৰি যায়৷[4]

কৰ্মপঞ্জী[সম্পাদনা কৰক]

চলচ্চিত্ৰ[সম্পাদনা কৰক]

  1. দূৰণিৰ ৰং (১৯৭৯)
  2. ব'হাগৰ দুপৰীয়া (১৯৮৪)
  3. যুগান্তৰৰ তেজাল পুৱা (২০০০)
  4. ৰণাংগন
  5. মহাসমৰ (২০১২)[5]

ধাৰাবাহিক[সম্পাদনা কৰক]

  1. অনেক ফুলৰ সুৰভি
  2. চক্ৰবেহু
  3. সুৰংগৰ শেষত
  4. কালৰত্ন
  5. অপাৰেছন ড্ৰাগ্‌ছ
  6. ঘাত-প্ৰতিঘাত
  7. জীৱন জোনাক
  8. Harmony North East[5]

তথ্য সংগ্ৰহ[সম্পাদনা কৰক]

  1. Prantik Deka (16 February 2016). "Jones Mahalia : Life and Work". KothaSobi. http://www.kothasobi.com/people/jones-mahalia-life-and-work/। আহৰণ কৰা হৈছে: 2 March 2016. 
  2. 2.0 2.1 "Jones Mahalia passes away". The Assam Tribune. 6 February 2016. http://m.dailyhunt.in/news/india/english/the-assam-tribune-epaper-theassam/jones-mahalia-passes-away-newsid-49340226। আহৰণ কৰা হৈছে: 2 March 2016. 
  3. 3.0 3.1 3.2 "'মহাসমৰ'ৰ মহাযোদ্ধা জ'নছ মহলীয়াৰ চিৰবিদায়". অসমীয়া প্ৰতিদিন. ৬ ফেব্ৰুৱাৰী ২০১৬. পৃষ্ঠা ১, ১৪. 
  4. "জনছ মহলীয়া প্ৰয়াত". জনসাধাৰণ. ৬ ফেব্ৰুৱাৰী ২০১৬. পৃষ্ঠা ১, ১০. 
  5. 5.0 5.1 "Filmmaker passes away". The Telegraph. 6 Februwary 2016. http://www.telegraphindia.com/1160206/jsp/northeast/story_67718.jsp#.VtXwl3qv-g0। আহৰণ কৰা হৈছে: 2 March 2016.