টাইগাৰ শ্ৰফ

টাইগাৰ শ্ৰফ
২০১৯ চনত শ্ৰফ
জন্ম	জয় হেমন্ত শ্ৰফ ২ মাৰ্চ, ১৯৯০ (৩৪ বছৰ) বম্বে, মহাৰাষ্ট্ৰ, ভাৰত
পেচা	অভিনেতা
সক্ৰিয় হৈ থকা সময়	২০১৪–বৰ্তমান
আত্মীয়-স্বজন	কৃষ্ণা শ্ৰফ (ভণ্টি) ৰঞ্জন দত্ত (ককা)

জয় হেমন্ত শ্ৰফ (জন্ম: ২ মাৰ্চ ১৯৯০), পেছাগতভাৱে টাইগাৰ শ্ৰফ (ইংৰাজী: Tiger Shroff) নামেৰে পৰিচিত, মূলতঃ হিন্দী ছবিত অভিনয় কৰা এগৰাকী ভাৰতীয় অভিনেতা। তেওঁ একচন ৰোমাঞ্চধৰ্মী ছবি হেৰোপন্তী (২০১৪)ত অভিনয়েৰে চলচ্চিত্ৰ জগতত খোজ দিয়ে। ছবিখনৰ বাবে তেওঁ "বৰ্ষশ্ৰেষ্ঠ নবাগত তাৰকা অভিনেতাৰ বিভাগত আইফা বঁটা" লাভ কৰে। তাৰ পিছত শ্ৰফে ব্যৱসায়িকভাৱে সফল একচনধৰ্মী ছবি বাঘী (২০১৬), বাঘী ২ (২০১৮), আৰু ৱাৰ (২০১৯)ত অভিনয় কৰিছিল। ইয়াৰ পিছতে তেওঁৰ অভিনীত হিৰোপন্তী ২ (২০২১), গণপথ (২০২৩) আৰু বড়ে মিয়াঁ ছোটে মিয়াঁ (২০২৪) আদি বিগ বাজেটৰ একচনধৰ্মী ছবিবোৰ ধাৰাবাহিকভাৱে বক্স অফিচত অসফল হয়।

২০১৯ চনত প্ৰতিষ্ঠিত, মিক্সড মাৰ্শ্বেল আৰ্টছ সংস্থা "মেট্ৰিক্স ফাইট নাইট" (এমএফএন)ৰ তেওঁ সহ-প্ৰতিষ্ঠাপক। ২০১৮ আৰু ২০১৯ চনত তেওঁ ফৰ্বছ ইণ্ডিয়াৰ "চেলিব্ৰিটি ১০০" তালিকাখনত স্থান লাভ কৰিছিল। অভিনেতা হোৱাৰ উপৰিও তেওঁ এগৰাকী কণ্ঠশিল্পীও। তেওঁ ইতিমধ্যেই কেইবাটাও একক গীতত কণ্ঠদান কৰিছে।

প্ৰাৰম্ভিক জীৱন আৰু পটভূমি

১৯৯০ চনৰ ২ মাৰ্চ তাৰিখে ভাৰতীয় চলচ্চিত্ৰ অভিনেতা জেকী শ্ৰফ আৰু তেওঁৰ পত্নী আয়েশ্বা শ্ৰফৰ গৃহত তেওঁ জন্মগ্ৰহণ কৰিছিল। তেওঁৰ সৰু ভনীয়েকৰ নাম কৃষ্ণা শ্ৰফ। পিতৃৰ ফালৰ পৰা তেওঁ গুজৰাটী আৰু তুৰ্কমেন বংশৰ হোৱাৰ বিপৰীতে মাতৃৰ ফালৰ পৰা তেওঁ বাঙালী আৰু বেলজিয়াম বংশৰ। তেওঁৰ ককাক আছিল বীৰ চক্ৰ বঁটা বিজয়ী এয়াৰ ভাইচ মাৰ্শ্বাল ৰঞ্জন দত্ত।

শ্ৰফ ভগৱান শিৱৰ এগৰাকী ধৰ্মপ্ৰাণ ভক্ত আৰু তেওঁৰ শাৰীৰিক সুস্থতাৰ কৃতিত্ব ভগৱান শিৱক দিছে। প্ৰতি সোমবাৰে আৰু প্ৰতি বছৰ মহা শিৱৰাত্ৰি উৎসৱৰ সময়ত তেওঁ উপবাসে থাকে। তেওঁ আমেৰিকান স্কুল অৱ বম্বেত অধ্যয়ন কৰিছিল।

যুদ্ধ কলাৰ অভিজ্ঞতা থকাৰ বাবে তেওঁ সঘনাই আন অভিনেতাসকলক ছবিৰ বাবে প্ৰশিক্ষণ দিয়ে। ২০১৪ চনত তেওঁ টাইকোৱাণ্ডোত সন্মানীয় পঞ্চম ডিগ্ৰীৰ ব্লেক বেল্ট লাভ কৰে।

বাহ্যিক সংযোগ

• টাইগাৰ শ্ৰফ সম্পৰ্কে ইণ্টাৰনেট মুভি ডাটাবেছত থকা তথ্য।
• টাইগাৰ শ্ৰফ সম্পৰ্কে বলিউড হাংগামাত থকা তথ্য
• টুইটাৰত টাইগাৰ শ্ৰফ