ৰেৱকান্ত মহন্ত
| ৰেৱকান্ত মহন্ত | |
|---|---|
 ভাৰতৰ ৰাষ্ট্ৰপতি প্ৰণৱ মুখাৰ্জীয়ে ৰেৱকান্ত মহন্তক ২০১৪ চনৰ সংগীত নাটক একাডেমী বঁটা প্ৰদানৰ মুহূৰ্ত | |
| জন্ম | ১৯ এপ্ৰিল, ১৯৩৫ (৮৯ বছৰ) খাটপাৰ সত্ৰ, শিৱসাগৰ জিলা, অসম |
| ৰাষ্ট্ৰীয়তা | ভাৰতীয় |
| পেচা | মুখা শিল্পী |
| জনা যায় | মুখা শিল্প |
| বঁটা, সন্মান, পুৰস্কাৰ আদি | সংগীত নাটক একাডেমী বঁটা, ২০১৪ বিষ্ণু ৰাভা বঁটা, ২০১৯ |
ৰেৱকান্ত মহন্ত (ইংৰাজী: Reba Kanta Mohanta, জন্ম: ১৯ এপ্ৰিল ১৯৩৫) এগৰাকী ভাৰতীয় অংকীয়া নাট আৰু মুখা শিল্পী। অসমৰ মুখা শিল্প জগতলৈ আগবঢ়োৱা অৱদানৰ স্বীকৃতি স্বৰূপে তেওঁ ২০১৪ চনৰ সংগীত নাটক একাডেমী বঁটা লাভ কৰিছিল।[1][2] ২০১৯ চনত অসম চৰকাৰে তেওঁক বিষ্ণু ৰাভা বঁটা প্ৰদান কৰে।
প্ৰাৰম্ভিক জীৱন
[সম্পাদনা কৰক]১৯৩৫ চনৰ ১৯ এপ্ৰিল তাৰিখে অসমৰ শিৱসাগৰ জিলাৰ খাটপাৰ সত্ৰত ৰেৱকান্ত মহন্তৰ জন্ম হৈছিল। সত্ৰীয় মুখা নিৰ্মাণৰ কলাৰ ওপৰত বিশেষ গুৰুত্ব দি তেওঁ পিতৃৰ পৰা সত্ৰ সংগীত, নৃত্য, খোল বাদন আৰু সঁজুলি নিৰ্মাণৰ জটিলতাসমূহ শিকিছিল। [1]
কৰ্মজীৱন
[সম্পাদনা কৰক]
ৰেৱকান্ত মহন্তয়ে সাংস্কৃতিক পৰিক্ৰমা মন্ত্ৰালয়, অসম সত্ৰ মহাসভা আৰু শ্ৰীমন্ত শংকৰদেৱ কলাক্ষেত্ৰত আয়োজিত মুখা নিৰ্মাণ কৰ্মশালা আৰু প্ৰদৰ্শনত অংশগ্ৰহণ কৰিছে। ইয়াৰ লগতে তেওঁ কলকাতাৰ ভাৰতীয় সংগ্ৰহালয়, ৱাশ্বিংটন ডি.চি.ৰ ৰাষ্ট্ৰীয় প্ৰাকৃতিক ইতিহাস সংগ্ৰহালয় আৰু নতুন দিল্লীৰ ইন্দিৰা গান্ধী ৰাষ্ট্ৰীয় কলা কেন্দ্ৰৰ দৰে সন্মানীয় সংগ্ৰহালয়ৰ দ্বাৰা প্ৰদৰ্শনৰ বাবে তেওঁৰ মুখা অধিগ্ৰহণ কৰা হৈছে। ২০০৩ চনৰ ভাৰতৰ গণৰাজ্য দিৱস পেৰেডত তেওঁৰ মুখায়ে অসম ৰাজ্যক প্ৰতিনিধিত্ব কৰিছিল। সেই বছৰ প্ৰতীকপটৰ মুখ্য বিষয় অসমৰ মুখা নিৰ্মাণ পৰম্পৰাৰ ওপৰত আধাৰিত আছিল।[1]
এজন দক্ষ মুখাশিল্পী হিচাপেও তেওঁ ইতিমধ্যে ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত খ্যাতি লাভ কৰিবলৈ সক্ষম হৈছে। তেওঁ কলকাতা, নতুন দিল্লী, ত্ৰিবান্দ্ৰম আদি বিভিন্ন স্থানত অনুষ্ঠিত মুখাশিল্পৰ কৰ্মশালা আৰু প্ৰদৰ্শনীত মুখ্য প্ৰশিক্ষক আৰু সমল ব্যক্তিৰূপেও অংশ গ্ৰহণ কৰিছে। তেওঁ শ্ৰীমন্ত শংকৰদেৱ কলাক্ষেত্ৰৰ সংগ্ৰহালয়ত প্ৰদৰ্শনৰ বাবে ৭০খন মুখা দান কৰাৰ উপৰি শিল্পী মহন্তই নিৰ্মাণ কৰা এখন নৰসিংহৰ বৰমুখা তেজপুৰ বিশ্ববিদ্যালয়ত, ৭০খন মুখা ইণ্ডিয়ান মিউজিয়াম অব কলকাতাত, পাঁচখন মুখা নতুন দিল্লীৰ ইন্দিৰা গান্ধী ৰাষ্ট্ৰীয় সংগ্ৰহালয়ত, সাতখন মুখা আমেৰিকা যুক্তৰাষ্ট্ৰৰ ৱাশ্বিংটন নেশ্যনেল মিউজিয়ামত, দুখন মুখা অষ্ট্ৰেলিয়াৰ সংগ্ৰহালয়ত আৰু পাঁচখন মুখা ৰাছিয়া আৰু জাপানৰ সংগ্ৰহালয়ত প্ৰদৰ্শনৰ বাবে ৰখা হৈছে।[3]
তেওঁ অসমৰ বিভিন্ন স্থানৰ লগতে কলকাতা, দিল্লী, বৃন্দাবন আদি ঠাইত বৰগীত, সত্ৰীয়া নৃত্য আৰু ভাওনা প্ৰদৰ্শন কৰি আহিছে।[4]
বঁটা আৰু সন্মান
[সম্পাদনা কৰক]২০০৮ চনত তেওঁ ভাৰত চৰকাৰৰ পৰা শিল্পগুৰু বঁটা লাভ কৰিছিল।[1] মুখাশিল্পৰ লগতে সত্ৰীয়া সংস্কৃতিৰ প্ৰতি জীৱনজোৰা সাধনাৰ স্বীকৃতি স্বৰূপে তেওঁক ২০১৪ চনত সংগীত নাটক একাডেমী বঁটাৰে সন্মানিত কৰা হৈছিল।[1] ২০১৯ চনত অসম চৰকাৰে তেওঁক বিষ্ণু ৰাভা বঁটা প্ৰদান কৰে।
তথ্য উৎস
[সম্পাদনা কৰক]- ↑ 1.0 1.1 1.2 1.3 1.4 "Reba Kanta Mohanta" (en ভাষাত). Sangeet Natak Akademi. https://sangeetnatak.gov.in/sna/citation_popup.php?id=1414&at=2। আহৰণ কৰা হৈছে: 22 March 2021.
- ↑ "Akademi Awardee" (en ভাষাত). Sangeet Natak Akademi. https://www.sangeetnatak.gov.in/Awardees.php?section=aa। আহৰণ কৰা হৈছে: 22 March 2021.
- ↑ "মুখাশিল্পী ৰেৱকান্ত মহন্ত, নৃত্য শিল্পী কুমাৰী লাই- তোনজমলৈ বিষ্ণু ৰাভা বঁটা" (as ভাষাত). janambhumi.in. https://janambhumi.in/VFhwRk1rMXFTVDA9/মুখাশিল্পী-ৰেৱকান্ত-মহন্ত,--নৃত্য-শিল্পী-কুমাৰী-লাই--তোনজমলৈ-বিষ্ণু-ৰাভা-বঁটা.html। আহৰণ কৰা হৈছে: ৫ এপ্ৰিল ২০২১.[সংযোগবিহীন উৎস]
- ↑ "ৰেৱকান্ত মহন্ত, কুমাৰী লাইতোনজম ইবেমপিশক দেৱীলৈ ৰাজ্য চৰকাৰৰ বিষ্ণু ৰাভা বঁটা" (as ভাষাত). assam.nenow.in. https://assam.nenow.in/assam-government-announced-kalaguru-bishnu-rabha-award/। আহৰণ কৰা হৈছে: ৫ এপ্ৰিল ২০২১.