যোৰহাট জিলাৰ পৰ্যটনস্থলসমূহৰ তালিকা

অসমীয়া ৱিকিপিডিয়াৰ পৰা
Jump to navigation Jump to search

যোৰহাট জিলা অসম ৰাজ্যৰ ৩২খন জিলাৰ ভিতৰত এখন। তলত যোৰহাট জিলাৰ কেইখনমান পৰ্যটনস্থলীৰ নাম যুগুতোৱা হ’ল।

ঐতিহাসিক পৰ্যটনস্থল[সম্পাদনা কৰক]

  • যোৰহাট জিমখানা ক্লাব : ১৮৭৬ চনত চেকনীধৰা গাঁৱত ডি. স্লিমনৰ দ্বাৰা যোৰহাট জিমখানা ক্লাবটো স্থাপিত হৈছিল।[1] স্থাপন হোৱা বছৰ ধৰি ইয়াত ঘোঁৰা দৌৰ অনুষ্ঠিত হৈ আহিছে য'ত বিজয়ীক "গ'ভাৰ্ণৰছ কাপ" প্ৰদান কৰা হয়।[2] ইয়াত থকা 'নাইন হ'ল গ'ল্ফ ক'ৰ্ছ' এছিয়াৰ আটাইতকৈ পুৰণি গ'ল্ফ ক'ছ আৰু বিশ্বৰ ভিতৰত তৃতীয় সৰ্বোচ্চ পুৰণি। ইয়াত এতিয়া ল'ন টেনিছ গ্ৰাছ ক'ৰ্ট, চুইমিং পুল, বিলিয়াৰ্ডছ্‌, প'ল' আৰু চিনেমা থিয়েটাৰৰ সুবিধা আছে। ইয়াত ক্ৰিকেটৰ বাবে 'যোৰহাট জিমখানা খেলপথাৰ'ও আছে।[1]
যোৰহাট জিমখানা ক্লাব
লাচিত বৰফুকনৰ মৈদাম
  • বঙাল পুখুৰী: যোৰহাট নগৰৰ দক্ষিণফালে ন-আলিৰ কাষত অৱস্থিত।[3][4] ১৭৩৯ চনত বদন বৰফুকনে গা ধুবলৈ যাওঁতে ৰূপসিং বঙালে তেওঁক হত্যা কৰিছিল। তাৰ বাবে তেওঁ লাভ কৰা পুৰষ্কাৰ ধনেৰে এই পুখুৰী খন্দোৱায়। মানুহ মাৰি পোৱা ধনেৰে নিৰ্মাণ কৰোৱা বাবে স্থানীয় ৰাইজে ইয়াৰ পানী ব্যৱহাৰ নকৰে।[3]
  • বিবুধি গড়: আহোম যুগত নিৰ্মিত এই গড়টোৰে মোৱামৰিয়া বিদ্ৰোহীসকলক বাধা দিয়াৰ চেষ্টা কৰা হৈছিল। আহোম ৰাজমন্ত্ৰী পূৰ্ণানন্দ বুঢ়াগোঁহাইৰ নেতৃত্বত ১৭৯১ চনত সজা গড়টো দেখি মোৱামৰী্য়া সকলে পোনতে বিবুধি হৈছিল বাবে ইয়াৰ নাম বিবুধি গড় পৰে । বৰ্তমানে যোৰহাট নগৰৰ গড় আলি পূৰ্বৰ বিবুধি গড়ৰেই একাংশ।
  • ৰজা মৈদাম : ১৮৯৪ চনৰ ১ অক্টোবৰত মৃত্যু হোৱা আহোম স্বৰ্গদেউ পুৰন্দৰ সিংহৰ সমাধিক্ষেত্ৰ। টোকোলাই নদীৰ দক্ষিণ পাৰে অৱস্থিত।

ধৰ্মীয় স্থান[সম্পাদনা কৰক]

  • ঢেকীয়াখোৱা বৰ নামঘৰ : অসমযোৰহাট নগৰৰ পৰা প্ৰায় ১৫ কিলোমিটাৰ পূবত ঢেকীয়াখোৱা বৰ নামঘৰ অৱস্থিত। ই ৩৭ নং ৰাষ্ট্ৰীয় ঘাইপথৰ পৰা প্ৰায় ৩.৫ কিঃমিঃ দূৰৰ ঢেকীয়াখোৱা গাঁৱত অৱস্থিত।[5] জনশ্ৰুতি অনুসৰি ১৪৬১ চনত মহাপুৰুষ মাধৱদেৱে এই নামঘৰ প্ৰতিষ্ঠা কৰিছিল।[5] মহাপুৰুষ মাধৱদেৱে এই স্থানতে এগছি বন্তি জ্বলাইছিল, যিগছি বন্তি সুদীৰ্ঘ চাৰে চাৰিশ বছৰ ধৰ্মপ্ৰাণ ৰাইজে জ্বলাই ৰাখিছে। এই বন্তি গছা এছিয়া বুক অফ ৰেকৰ্ডছ আৰু ইণ্ডিয়া বুক অফ ৰেকৰ্ডছ-এ "দীৰ্ঘতম সময়ৰ বাবে প্ৰজ্বলিত বন্তি" বুলি স্বীকৃতি প্ৰদান কৰিছে।[6][7] নামঘৰটোৰ মুঠ মাটিকালি ১৩ বিঘা।[5] ভাদ মাহত ঢেকীয়াখোৱা বৰ নামঘৰ মৰ্ত্যৰ বৈকুণ্ঠপুৰীলৈ পৰিণত হয় বুলি লোকবিশ্বাস আছে। ভক্তসকলে নিজৰ মতে নামঘৰলৈ দান বৰঙণি আগবঢ়ায় আৰু পৰিচালনা সমিটিয়ে ইয়াক সামাজিক আৰু সাংস্কৃতিক উন্নতিৰ বাবে ব্যৱহাৰ কৰে । ই বৈষ্ণৱ ধৰ্ম আৰু অসমৰ মানুহৰ মাজত একতা বজাই ৰখাত সহায় কৰি আহিছে।
ঢেকীয়াখোৱা বৰ নামঘৰ
  • বুঢ়ীগোসানী দেৱালয় : বুঢ়ীগোসানী দেৱালয় হৈছে যোৰহাট নগৰৰ মাজমজিয়াত গড় আলিৰ পূবে অৱস্থিত এক শাক্ত মন্দিৰ। ১৭০৮ চনত আহোম স্বৰ্গদেউ ৰুদ্ৰসিংহই জয়ন্তীয়া ৰাজ্যৰ পৰা গোসানীৰ বিগ্ৰহ আনি গড়গাঁৱত স্থাপন কৰিছিল। গড়গাঁৱৰ পৰা ৰংপুৰ আৰু ৰংপুৰৰ পৰা যোৰহাটলৈ আহোম ৰাজ্যৰ ৰাজধানী সলনি হোৱাত পিছলৈ এই দেৱালয় বৰ্তমানৰ ঠাইত স্থাপিত কৰা হয়।[8] মন্দিৰত থকা মূৰ্তিজনা দুৰ্গা দেৱীৰ। আগৰ দিনত বুঢ়ীগোসানী দেৱালয়ক "বৰপূজাঘৰ দ'ল" বুলিও জনা গৈছিল।
  • দক্ষিণপাট সত্ৰ : দক্ষিণপাট সত্ৰ হৈছে অসমৰ চাৰিখন ৰাজ সত্ৰৰ ভিতৰত দ্বিতীয় শাৰীৰ সত্ৰ। শিষ্যৰ সংখ্যা কেউখন ৰাজসত্ৰৰ ভিতৰত আটাইতকৈ বেছি। আহোম ৰজা জয়ধ্বজ সিংহৰ দিনত ১৫৮৪ শকত মাজুলিত স্থাপন কৰা হয়। প্ৰথমজন সত্ৰাধিকাৰ আছিল শ্ৰীশ্ৰী বনমালিদেৱ । এতিয়ালৈকে পোন্ধৰজনে সত্ৰাধিকাৰ পদত অধিষ্ঠিত হৈছে । বৰ্তমানৰ সত্ৰাধিকাৰ হ’ল শ্ৰী শ্ৰী ৰমানন্দ দেৱগোস্বামী । বিভিন্ন কাৰণত এই সত্ৰখন কেইবাবাৰো স্থানান্তৰ কৰিব লগা হৈছে। মূল সত্ৰখন মাজুলীত অৱস্থিত । বৰ্তমান ইয়াৰ এখন শাখাসত্ৰ যোৰহাট জিলাৰ টীয়কৰ চটাইত স্থাপন কৰা হৈছে৷
  • গড়মূৰ সত্ৰ : গড়মূৰ সত্ৰ হৈছে অসমৰ চাৰি ৰাজ সত্ৰৰ তৃতীয় শাৰীৰ সত্ৰ। স্থাপন কাল হিচাপে দ্বিতীয়। প্ৰতিষ্ঠাপক সত্ৰাধিকাৰ শ্ৰী শ্ৰী জয়হৰিদেৱ। প্ৰথমে গড়মূৰ সত্ৰ দুখন আছিল। এখন বৰ গড়মূৰ আৰু আনখন সৰু গড়মূৰ। দুয়োখন মাজুলীৰ সাৰজানৰ কাষত ওচৰা-ওচৰিকৈ আছিল। পাছত দুয়োখন চামিল হৈ এক হয়। আহোম ৰজা প্ৰতাপ সিংহই বন্ধোৱা ছেৱাতল গড়ৰ মূৰতে স্থাপন কৰা বাবে সত্ৰখনৰ নাম হয় গড়মূৰ সত্ৰ। বাকী তিনিখন ৰাজ সত্ৰৰ দৰে এইখন সত্ৰৰ আজিলৈকে এবাৰো স্থান পৰিৱৰ্ত্তন কৰিব লগা হোৱা নাই। আগতে গড়মূৰ সত্ৰৰ অতুল ঐশ্বৰ্য্য সম্পত্তি আছিল। ১৮৩৬ চনত ডেভিদ স্কটৰ ইস্তহাৰত সন্মতি নিদি ইংৰাজৰ আনুগত্য স্বীকাৰ নকৰাত সত্ৰৰ ২৪০০০ পুৰা লাখেৰাজ ভুমি বৃত্তি পৰিত্যাগ কৰিব লগা হয়। এই ঘটনা চলাজনা অধিকাৰ শ্ৰী শ্ৰী ৰঘুদেৱৰ দিনত ঘটে। বৰ্তমান সত্ৰখন বিশেষকৈ ইচ্ছাকৃত বৰঙণিৰ ওপৰতহে চলি আছে।
  • গৰখীয়া দৌল : গৰখীয়া দ'ল বা গৰখীয়া দৌল হৈছে যোৰহাট নগৰৰ উত্তৰে প্ৰায় পাঁচ কিলোমিটাৰ আঁতৰৰ বালিগাঁৱত অৱস্থিত এখন প্ৰাচীন দেৱালয়। অসম বুৰঞ্জীত ইয়াৰ উল্লেখ নাই যদিও এই দ'ল জাগ্ৰত বুলি জনবিশ্বাস আছে। গৰখীয়া দ'লৰ নামঘৰ আৰু মণিকূট থকাটো উল্লেখযোগ্য।[11] ইয়াত থকা উঁই-হাফলুৰ দ'লটো চৈধ্য-পোন্ধৰফুটমান ওখ।
গৰখীয়া দৌল
  • কমলাবাৰী সত্ৰ : মহাপুৰুষ মাধৱদেৱৰ প্ৰিয় শিষ্য বদুলা আতাই এই সত্ৰ প্ৰতিষ্ঠা কৰিছিল।এওঁৰ প্ৰকৃত নাম কমলাকান্ত আতা।মহাপুৰুষ শংকৰদেৱৰ আজ্ঞামৰ্মে মাধৱদেৱৰ গাৰ বদ্বল দি ধৰ্মপ্ৰচাৰৰ অনুমতি দিয়াত বদলা নাম পায়।সেয়ে বদলা পদ্ম আতাৰুপে পৰিচিত হয়।কালক্ৰমত এইখন সত্ৰ দুভাগ হয়।উত্তৰ দিশত প্ৰতিষ্ঠা হোৱা বাবে এখনক উত্তৰ কমলাবাৰী সত্ৰ আৰু মূল সত্ৰখন নতুন কমলাবাৰী সত্ৰ বুলি পৰিচিত হয়।বৰ্তমান উত্তৰ কমলাবাৰী সত্ৰৰ সত্ৰাধিকাৰ শ্ৰীশ্ৰী জনাৰ্দন দেৱগোস্বামী আৰু নতুন কমলাবাৰী সত্ৰৰ সত্ৰাধিকাৰ শ্ৰীশ্ৰী নাৰায়ন চন্দ্ৰ দেৱগোস্বামী।
  • বৰভেটী থান
  • বেঙেনা আটী সত্ৰ

প্ৰাকৃতিক[সম্পাদনা কৰক]

  • মাজুলী : বিশ্বৰ বৃহত্তম নদীদ্বীপ মাজুলী যোৰহাটৰ পৰা ২০ কি:মি: উত্তৰত অৱস্থিত। দক্ষিণে ব্ৰহ্মপুত্ৰ নদী আৰু উত্তৰে ব্ৰহ্মপুত্ৰৰ সুঁতি খেৰকুটীয়াৰ লগত সোৱনশিৰী নৈ লগ লাগি নদীদ্বীপটোৰ গঠন কৰিছে। পূৰ্বে মাজুলীৰ মাটিকালি ১২৫০ বৰ্গকিলোমিটাৰ (৪৮৩ বৰ্গমাইল) আছিল, কিন্তু খহনীয়াৰ ফলত ২০০১ চনত ইয়াৰ মাটিকালি হয়গৈ ১৬৩ বৰ্গমাইল। ইয়াক আৱৰি থকা নদীৰ বিস্তৃতি বাঢ়ি অহাৰ লগে লগে মাজুলীৰ সংকোচন হৈছে।[12]। মাজুলী এক প্ৰাকৃতিক আৰু সাংস্কৃতিক ঐতিহ্য ক্ষেত্ৰ। নৱবৈষ্ণৱ ধৰ্মৰ ২২ খন সত্ৰ মাজুলীত আছে যাৰ ভিতৰত আউনীআটী সত্ৰ, গড়মূৰ সত্ৰ আৰু কমলাবাৰী সত্ৰ উল্লেখযোগ্য। যোৰহাটৰ নিমাতী ঘাটৰপৰা ফেৰীৰে মাজুলীলৈ অহা-যোৱাৰ সুবিধা আছে।
পৃথিৱীৰ বৃহত্তম নদীদ্বীপ মাজুলীলৈ যোৱাৰ পথ
  • হোলোঙাপাৰ গিবন অভয়াৰণ্য : হোলোঙাপাৰ গিবন অভয়াৰণ্য (পূৰ্বে হোলোঙাপাৰ সংৰক্ষিত বনাঞ্চল বুলি জনা গৈছিল) হৈছে চিৰসেউজ অৰণ্যৰ এক সংৰক্ষিত অঞ্চল। ১৯৯৭ চনত ইয়াক চৰকাৰীভাৱে অভয়াৰণ্যৰ মৰ্যদা দিয়া হয়। ১৮৮১ চনত প্ৰতিষ্ঠিত এই বনাঞ্চলৰ সীমা পাটকাই পৰ্বতৰ পাদদেশলৈকে বিস্তৃত আছিল। পিছলৈ অৰণ্যখন সৰু সৰু গাঁও আৰু চাহ বাগানে আৱৰি ধৰে। ১৯শ শতিকাৰ প্ৰথম ভাগত অৰণ্যখনৰ বিকাশৰ বাবে বৃক্ষৰোপণ কৰা হৈছিল আৰু ফলত জৈৱ বৈচিত্ৰও বৃদ্ধি পায়। হোলোঙাপাৰ গিবন অভয়াৰণ্যত ভাৰতৰ একমাত্ৰ গিবন হলৌ বান্দৰ আৰু উত্তৰ-পূব ভাৰতৰ একমাত্ৰ নিশাচৰ প্ৰাইমেট লাজুকী বান্দৰ পোৱা যায়।

অন্যান্য[সম্পাদনা কৰক]

  • চন্দ্ৰকান্ত সন্দিকৈ ভৱন: চন্দ্ৰকান্ত সন্দিকৈ ভৱন হৈছে অসম সাহিত্য সভাৰ মুখ্য কাৰ্যালয়।[13] অসমৰ বিভিন্ন জনগোষ্ঠীৰ ভাষাসমূহৰ উন্নতিৰ কাম-কাজৰ লগত এই ভৱনটো জড়িত হৈ আছে। ১৯২৬ চনত ৰাধাকান্ত সন্দিকৈয়ে তেওঁৰ পুত্ৰ চন্দ্ৰকান্ত সন্দিকৈৰ স্মৃতিত এই ভৱনটো দান বৰঙণি হিচাপে আগবঢ়াইছিল।[13] পুৰণি ভৱনটোৰ কিছু অংশ ক্ষতি হোৱাত ইয়াক পুনৰ নিৰ্মাণ কৰা হয়। অসম চৰকাৰে এই ভৱনটোৰ পুনৰ নিৰ্মাণ কৰাৰ দায়িত্ব লৈছিল। পূৰ্বৰ ভৱনটোৰ স্থানতে নতুন ভৱনটোৰ নিৰ্মাণ কৰা হয়।[13][14]
  • ঠেঙাল ভৱন : ঠেঙাল ভৱন হৈছে অসমৰ যোৰহাট জিলাত অৱস্থিত এটা পুৰণি ভৱন। ৰায়বাহাদুৰ শিৱপ্ৰসাদ বৰুৱাই ১৮৮০ দশকত ঠেঙাল ভৱনটো নিৰ্মাণ কৰিছিল।[15] ১৯২৯ চনত তেওঁ ইয়াতেই এটা ছপাশাল বহুৱায়। প্ৰথমতে, ইয়াৰ পৰা সাপ্তাহিক বাতৰি কাকত এখন প্ৰকাশ পাইছিল।[16][17] এই ছপাশালটোৰ পৰাই নীলমণি ফুকনৰ সম্পাদনাত ১৯৩৫ চনৰ ১২ আগষ্টত প্ৰথম অসমীয়া দৈনিক বাতৰি কাকত দৈনিক বাতৰি প্ৰকাশ হৈছিল।[17][15] এই বাতৰি কাকতখন সম্পাদক আছিল নীলমণি ফুকন। বৰ্তমান এই ভৱনটো অতিথিশালালৈ পৰিৱৰ্তন কৰা হৈছে।
  • মৌ চাপৰি : মৌ চাপৰি হৈছে নিমাতীঘাটৰ ওচৰত অৱস্থিত এটা সৰু নদী-দ্বীপ। এই দ্বীপটো ব্ৰহ্মপুত্ৰৰ বুকুত অৱস্থিত। আমোদ-প্ৰমোদৰ বাবে ভাল ব্যৱস্থা আছে।
  • কাজিৰঙা গ'ল্ফ ৰিজ'ৰ্ট : চাংচোৱা আৰু গটঙা চাহ বাগিছাৰ ওচৰত এক সুন্দৰ প্ৰাকৃতিক পৰিৱেশৰ মাজত এই গ'ল্ফ ৰিজ'ৰ্ট অৱস্থিত ।
  • চুকাফা সমন্বয় ক্ষেত্ৰ : প্ৰথম আহোম ৰজা চুকাফাৰ স্মৃতিৰক্ষাৰ বাবে যোৰহাটৰ ওচৰৰ ম'হবন্ধাত নিৰ্মাণ কৰা হৈছে। ৰাজ্য চৰকাৰে ইয়াৰ বাবে ২০ কোটি টকাৰ অনুদান দিছে।
  • আয়ুৰ সঞ্জীৱা : টিলকিৰাম চাহ বাগিছাৰ ভিতৰত অৱস্থিত এক স্বাস্থ্য ৰক্ষাৰ ক্ষেত্ৰ।

তথ্য সংগ্ৰহ[সম্পাদনা কৰক]

  1. 1.0 1.1 "Gymkhana Club". BharatOnline.com. http://www.bharatonline.com/assam/jorhat/jorhat-gymkhana.html। আহৰণ কৰা হৈছে: January 06, 2013. 
  2. "Jorhat Gymkhana Club". 1stHorse ~ wHere the Horse comes first.. http://www.1sthorse.com/1h/index.php?view=venueevents&id=46%3Ajorhat-gymkhana-club&option=com_eventlist&Itemid=86। আহৰণ কৰা হৈছে: January 06, 2013. 
  3. 3.0 3.1 "All destination at a glance". Sulekha.com. Sulekha.com. http://travel.sulekha.com/jorhat-attractions.htm। আহৰণ কৰা হৈছে: January 09, 2013. 
  4. "Must See India: Bangalpukhari, Jorhat". Roam Space Travel Solutions Pvt Ltd. http://www.mustseeindia.com/Jorhat-Bangalpukhari/attraction/18978। আহৰণ কৰা হৈছে: January 09, 2013. 
  5. 5.0 5.1 5.2 "Dhekiakhowa Bornamghar, Assam". MobME Wireless Solutions Private Limited.. August 06, 2011. http://www.mobshare.in/channel/morahom/post/IzM4MUduOTB1c2dLTCoqKjI1NzY3NA। আহৰণ কৰা হৈছে: November 02, 2012. 
  6. "Lamp burning for 484 years enters Asia Book of Records". Deccan Chronicle. August 19, 2012. http://www.deccanchronicle.com/channels/nation/northeast/lamp-burning-484-years-enters-asia-book-records-507। আহৰণ কৰা হৈছে: November 02, 2012. 
  7. "ঢেকীয়াখোৱা বৰ নামঘৰৰ অভিলেখ". www.assaminfo.com. 2012. http://www.assaminfo.com/tourist-places/22/dhekiakhowa-bornamghor.htm। আহৰণ কৰা হৈছে: November 02, 2012. 
  8. সম্পাদনা: ড০ মহেশ্বৰ নেওগ (২০০৪). পৱিত্ৰ অসম. প্ৰকাশক গুৱাহাটী: অসম সাহিত্য সভা. পৃষ্ঠা. ৬৮-৭০. 
  9. চাৰি ৰাজসত্ৰৰ বুৰঞ্জী - সম্পাদক : শিৰীষ কুমাৰ ভট্টাচাৰ্য্য, প্ৰকাশক : দক্ষিণপাট সত্ৰ শিষ্য সন্মিলন, প্ৰকাশ কাল : ১৯৯৭ চন
  10. SriSri Auniati Satra, auniati.org, আহৰণ-১০ ছেপ্টেম্বৰ ২০১১
  11. সম্পাদক- ড: মহেশ্বৰ নেওগ (২০০৪). পৱিত্ৰ অসম. প্ৰকাশক গুৱাহাটী: লয়াৰ্ছ বুক ষ্টল. পৃষ্ঠা. ৬৬-৬৭. 
  12. A Capricious River, an Indian Island’s Lifeline, Now Eats Away at It April 14, 2013 New York Times
  13. 13.0 13.1 13.2 "Buildings and Monuments in Jorhat". Pan India Internet Private Limited. http://www.jorhatonline.in/About/Tourism/Buildings-and-Monuments.html। আহৰণ কৰা হৈছে: January 09, 2013. 
  14. "Chandrakanta Handique Bhavan inaugurated". assam tribune. January 12, 2011. http://www.assamtribune.com/scripts/detailsnew.asp?id=jan1211/state06। আহৰণ কৰা হৈছে: January 09, 2013. 
  15. 15.0 15.1 "About Thengal Bhavan". holidayiq.com. http://www.holidayiq.com/Thengal-Bhavan-Jorhat-Sightseeing-808-15077.html। আহৰণ কৰা হৈছে: January 06, 2013. 
  16. "Thengal Bhawan". www.tourism.co.in. http://tourism.co.in/mainpage.php?action=place&id=855। আহৰণ কৰা হৈছে: January 06, 2013. 
  17. 17.0 17.1 "Heritage North-East". Contadgreen. Heritage North East Pvt. Ltd.. http://www.heritagetourismindia.com/। আহৰণ কৰা হৈছে: January 06, 2013. 

বাহ্যিক সংযোগ[সম্পাদনা কৰক]