শ্ৰী শ্ৰী অনিৰুদ্ধদেৱ ক্ৰীড়া বিশ্ববিদ্যালয়

অসমীয়া ৱিকিপিডিয়াৰ পৰা
নেভিগেশ্যনলৈ যাওক সন্ধানলৈ যাওক
শ্ৰী শ্ৰী অনিৰুদ্ধদেৱ ক্ৰীড়া বিশ্ববিদ্যালয়
স্থাপিত ২০২০ চন
ধৰণ ৰাজহুৱা
আচাৰ্য জগদীশ মুখী (অসমৰ ৰাজ্যপাল)
উপাচাৰ্য জয় প্ৰকাশ বাৰ্মা
স্থান চাবুৱা, অসম, ভাৰত
ভুক্তি বিশ্ববিদ্যালয় অনুদান আয়োগ

শ্ৰী শ্ৰী অনিৰুদ্ধদেৱ ক্ৰীড়া বিশ্ববিদ্যালয় ডিব্ৰুগড় জিলাচাবুৱাত অৱস্থিত এখন ৰাজ্যিক ক্ৰীড়া বিশ্ববিদ্যালয়। এই বিশ্ববিদ্যালয় খন অসম চৰকাৰে ২০১৮ চনৰ ছেপ্টেম্বৰত গৃহীত কৰা শ্ৰী শ্ৰী অনিৰুদ্ধদেৱ ক্ৰীড়া বিশ্ববিদ্যালয় বিধেয়ক, ২০১৮ৰ অধীনত স্থাপন কৰিছে। বিশ্ববিদ্যালয়খন ২০২০ চনৰ ১০ জুলাই তাৰিখৰ পৰা কাৰ্যক্ষম হয়। বিশ্ববিদ্যালয়খনৰ নাম বৈষ্ণৱ ধৰ্মপ্ৰচাৰক ধৰ্মপ্ৰচাৰক, কবি আৰু মায়ামৰা সত্ৰ সম্প্ৰদায়ৰ প্ৰৱৰ্তক শ্ৰী শ্ৰী অনিৰুদ্ধদেৱৰ নামেৰে নামাকৰণ কৰা হৈছে। এইখন অসমৰ প্ৰথম আৰু ভাৰতৰ চতুৰ্থ কাৰ্যক্ষম চতুৰ্থ ৰাজ্যিক ক্ৰীড়া বিশ্ববিদ্যালয়।

ইতিহাস[সম্পাদনা কৰক]

২০১৮ চনৰ ২৭ মে' তাৰিখে তিনিচুকীয়া জিলাৰ আই টি আই খেলপথাৰত মটক জনগোষ্ঠীৰ বিভিন্ন সামাজিক-সাংস্কৃতিক যুৱ আৰু ছাত্ৰ সংগঠনৰ দ্বাৰা আয়োজিত ২১৩ সংখ্যক স্বৰ্গদেউ সৰ্বানন্দ সিংহ দিৱস আৰু মটক জনগোষ্ঠীয় সংস্কৃতিক সমাৰোহৰ লগত সংগতি ৰাখি প্ৰদান কৰা স্বৰ্গদেউ সৰ্বানন্দ সিংহ বঁটা গ্ৰহণ কৰি মুখ্যমন্ত্ৰী সৰ্বানন্দ সোণোৱালে ডিব্ৰুগড় জিলাৰ চাবুৱাত শ্ৰী শ্ৰী অনিৰুদ্ধদেৱৰ নামেৰে ক্ৰীড়া বিশ্ববিদ্যালয় প্ৰতিষ্ঠা কৰাৰে কথা ঘোষণা কৰিছিল।[1] সেই মৰ্মে ২০১৮ চনৰ ২৬ ছেপ্টেম্বৰত অসম বিধানসভাশ্ৰী শ্ৰী অনিৰুদ্ধদেৱ ক্ৰীড়া বিশ্ববিদ্যালয় বিধেয়ক, ২০১৮ উপস্থাপন কৰা হৈছিল।[2] বিধেয়কখন বিধানসভাত গৃহীত হোৱাৰ পিছত বিশ্ববিদ্যালয়খনৰ স্থাপনৰ প্ৰাৰম্ভিক কাম-কাজ আৰম্ভ হয়।[3] ২০২০ চনৰ ১০ জুলাই তাৰিখে অসম চৰকাৰে অধ্যাপক জয় প্ৰকাশ বাৰ্মাক বিশ্ববিদ্যালয়খনৰ প্ৰথম উপাচাৰ্য হিচাপে নিযুক্ত কৰে।[4] তেওঁ মধ্য প্ৰদেশত গোৱালিৱৰত অৱস্থিত লক্ষ্মীবাঈ ৰাষ্ট্ৰীয় শাৰীৰিক শিক্ষা প্ৰতিষ্ঠানৰ ক্ৰীড়া মনোবিজ্ঞান বিভাগৰ প্ৰাক্তন মুৰব্বী অধ্যাপক।

অৱস্থান[সম্পাদনা কৰক]

বৰ্তমান বিশ্ববিদ্যালয়খন ডিব্ৰুগড় জিলাৰ চৌকিডিঙিত অৱস্থিত জিলা ঔদ্যোগিক আৰু বাণিজ্য কেন্দ্ৰৰ দ্বিতীয় মহলাৰ পৰা অস্থায়ী চৌহদৰ পৰা কাৰ্যক্ষম হৈছে। চাবুৱাৰ বালিজান অঞ্চলৰ পানী এৰা গাঁৱৰ স্থায়ী চৌহদৰ আন্তঃগাঁথনিৰ কাম সম্পূৰ্ণ হলে বিশ্ববিদ্যালয়খন তালৈ স্থানান্তৰ কৰা হ'ব।

তথ্য উৎস[সম্পাদনা কৰক]