আদালত (চলচ্চিত্ৰ)

আদালত Adalat
আদালতৰ এটা দৃশ্যত জৰ্জ বেকাৰ
পৰিচালক	দিলীপ ডেকা
প্ৰযোজক	দিলীপ ডেকা
অভিনয়ত	জৰ্জ বেকাৰ অনুপমা ভট্টাচাৰ্য কৃষ্ণা দাস
চিত্ৰগ্ৰহণকাৰী	দীনদয়াল বাজৰীয়া
সম্পাদনা	ৰবীন বেনাৰ্জী
সংগীত পৰিচালক	জীতু-তপন
মুক্তি	১০ ডিচেম্বৰ ১৯৭৬
দেশ	ভাৰত
ভাষা	অসমীয়া

আদালত (ইংৰাজী: Adalat) ১৯৭৬ চনত মুক্তি পোৱা এখন ক’লা-বগা অসমীয়া চলচ্চিত্ৰ। লাচিত চিত্ৰমৰ বেনাৰত নিৰ্মাণ কৰা ছবিখনৰ পৰিচালক, প্ৰযোজক, কাহিনী, চিত্ৰনাট্য আৰু সংলাপ দিলীপ ডেকাৰ। সঙ্গীত জীতু-তপনৰ। মূল ভূমিকাত অভিনয় কৰিছে জৰ্জ বেকাৰ দীনেশ দাস, অনুপমা ভট্টাচাৰ্য আদিয়ে। ডকাইতৰ জীৱনৰ আধাৰত ছবিখনৰ কাহিনী ৰচনা কৰা হৈছে। এনে বিষয়ত নিৰ্মিত এইখন প্ৰথম অসমীয়া ছবি। ইয়াত যথেষ্ট পৰিমাণৰ হিন্দী সংলাপ সংযোজন কৰা হৈছে। হিন্দী সংলাপ সংযোজন কৰাৰ দিশেৰেও আদালত প্ৰথম অসমীয়া ছবি।

কাহিনীৰ সাৰাংশ

এদিন নিশা ডকাইত বাদলে সত্য দুৱৰাৰ ঘৰত সোমায় তেওঁক হত্যা কৰিবলৈ। কিন্তু এটা শিশুক দেখি দুৱৰাক হত্যা নকৰিলে আৰু শিশুটোক অপহৰণ কৰি লৈ গুচি আহিল। শিশুটোক বন্দুক মৰা, ঘোঁৰাত উঠা আদি সকলো শিকোৱা হ’ল। ডাঙৰ হৈ এই শিশুটোৱে হ’ল ইন্দ্ৰজিত, দুখীয়া-নিছলাৰ ত্ৰাণকৰ্তা।

এদিন হঠাৎ ভূপেন্দ্ৰ চৌধুৰীৰ সৈতে বাদলৰ দেখা-সাক্ষাৎ হয়। পূৰ্বৰ শত্ৰুতা থকা চৌধুৰীক দেখি বাদলৰ মনত প্ৰতিশোধৰ অগনি জ্বলি উঠে। চৌধুৰীৰ একমাত্ৰ ছোৱালী ৰূপা। বাদলে ভাবিলে, এই ৰূপাই চৌধুৰীক বশ কৰাৰ একমাত্ৰ উপায়।

পিছলৈ সত্য দুৱৰাৰ এজনী ছোৱালী হয়- ৰীতা। ৰূপা তাইৰ কলেজীয়া বান্ধৱী। বেৰিষ্টাৰ হাজৰিকাৰ তোলনীয়া পুতেক তথা ওকালতিৰ সহযোগী বিমললৈ ৰীতাক বোৱাৰী কৰি নিম বুলি আঙুঠি পিন্ধাই থলে।

কিন্তু আঙুঠি পিন্ধোৱাৰ ৰাতি ৰীতা ঘৰত আছিলনে, ৰীতা আৰু বিমলৰ বিয়াখন হৈ উঠিল নে, বাদলৰ প্ৰকৃত পৰিচয় কি, কিয় তেওঁ সত্য দুৱৰাক হত্যা কৰিবলৈ গৈ শিশুটিক অপহৰণ কৰি আনিলে, ভূপেন্দ্ৰ চৌধুৰীৰ সৈতে তেওঁৰ সম্পৰ্ক কি- এনেবোৰ ৰহস্যঘন বিষয়েৰে আদালত ছবিখনৰ কাহিনীভাগ গঢ় লৈছে।

অভিনয় শিল্পী

জৰ্জ বেকাৰ (ইন্দ্ৰজিৎ) নীলু চক্ৰৱৰ্তী (বাদল) দীনেশ দাস (ডকাইত দলৰ সদস্য) ঈষাণ বৰুৱা (বিমল) কৃষ্ণা দাস (কৃষ্ণা) অনুপমা ভট্টাচাৰ্য (সত্য দুৱৰাৰ পত্নী) নিত্যা দত্ত অখিল ডেকা

চাকিৰ হাজৰিকা বিৰিঞ্চি ভট্টাচাৰ্য ৰমেন বৰুৱা ইন্দ্ৰ বনিয়া (খেতিয়ক হলধৰ) মিৰেল কুদ্দুচ (বেৰিষ্টাৰ হাজৰিকাৰ লগুৱা) উজ্জ্বলা মণিকা শুভলক্ষ্মী আদি।

সংগীত

সঙ্গীত পৰিচালনা জীতু-তপনৰ। গীতৰ সংখ্যা ৬টা। গীত লিখিছে নুৰুল হক, দৰ্পনাথ শৰ্মা আৰু নৱকান্ত বৰুৱাই।

গীতৰ শীৰ্ষ
নং	শিৰোনাম	গীতিকাৰ	কণ্ঠশিল্পী	দৈৰ্ঘ্য
1.	"ৰূপ জ্বলে জলমল মন চগা চঞ্চল মায়াৱী এই ৰাতি জলমল কৰে জলমল"	নুৰুল হক	বনশ্ৰী সেনগুপ্ত
2.	"দেৱতা কোৱা মোৰ মন মন্দিৰত জ্বলোৱা চাকিটি কোনেনো নুমালে"	দৰ্পনাথ শৰ্মা	বনশ্ৰী সেনগুপ্ত
3.	"আঘোণে আনিলে হাঁহি আনিলে সোণালী পথাৰে আজি হাঁহিলে"	নুৰুল হক	দ্বীপেন বৰুৱা
4.	"মাটিৰ প্ৰদীপ হৈ জ্বলি ৰম মই তোমাৰ মিলনৰ মহানিশা"	দৰ্পনাথ শৰ্মা	দ্বীপেন বৰুৱা
5.	"ফাগুণে আনিলে ফুলৰ শৰাই মন যে পখিলা উৰাদি উৰিয়ে যায়"	নুৰুল হক	বনশ্ৰী সেনগুপ্ত, দ্বীপেন বৰুৱা
6.	"মন কিয় সপোন ৰঙীন তুমি জানা নেকি, এই মধুৰ স্বপ্ন খেলা আমাৰ চিনাকি"	নৱকান্ত বৰুৱা	দ্বীপেন বৰুৱা

বাহ্যিক সংযোগ

ইউটিউৱত আদালত ছবি গীত সংকলন ৱেবচাইটত আদালতৰ গীত