চিৰাং জিলা

অসমীয়া ৱিকিপিডিয়াৰ পৰা
(ছিৰাং জিলাৰ পৰা পুনঃনিৰ্দেশিত)
Jump to navigation Jump to search
চিৰাং জিলা
—  অসমৰ জিলা  —
অসমত চিৰাংৰ অৱস্থান
দেশ  ভাৰত
ৰাজ্য অসম
প্ৰশাসনিক বিভাগ বড়োলেণ্ড স্বায়ত্বশাসিত পৰিষদ
স্থাপিত ৪ জুন ২০০৪ (2004-06-04)
সদৰ কাজলগাঁও
মহকুমা কাজলগাঁও, বিজনী
চৰকাৰ
 - লোকসভা সমষ্টি কোকৰাঝাৰ
 - বিধানসভা সমষ্টি ছিদলী (৩১), বিজনী (৩৩)
মাটিকালি
 - মুঠ ১,৯২৩ কি.মি. 
(৭৪২.৫ বৰ্গ মাইল)
জনসংখ্যা (২০১১)[1]
 - মুঠ ৪,৮২,১৬২ জন
 - জনঘনত্ব ২৫০.৭ প্ৰতি বৰ্গ কি.মি. 
(৬৪৯.৪ প্ৰতি বৰ্গ মাইল)
জনসংখ্যাৰ তথ্য
 - সাক্ষৰতা হাৰ ৬৩.৫৫%
 - লিংগ অনুপাত ৯৬৯
সময় অঞ্চল ভা.মা.স. (গ্ৰী.মা.স.+০৫:৩০)
ৱেবছাইট আনুষ্ঠানিক ৱেবছাইট

চিৰাং জিলা (বড়ো: चिरांग जिला) ভাৰতবৰ্ষৰ অন্তৰ্গত অসমৰ পশ্চিম প্ৰান্তত অৱস্থিত আৰু বড়োলেণ্ড স্বায়ত্বশাসিত পৰিষদৰ অন্তৰ্গত চাৰিখন জিলাৰ এখন। ২০০৪ চনত কোকৰাঝাৰ, বঙাইগাঁও আৰু বৰপেটা জিলাৰ অংশবিশে সাঙুৰি চিৰাং জিলা গঠন কৰা হৈছিল। এই জিলা ভাৰতীয় সংবিধানৰ ষষ্ঠ অনুচ্ছেদৰ অন্তৰ্গত। ব্ৰহ্মপুত্ৰ নদীৰ নামনি উপত্যকাৰ সমভূমি ভূ-ভাগেৰে এই জিলা গঠিত। গাৰো ভাষাৰ শব্দ চি (অৰ্থ: পানী) আৰু ৰাং (অৰ্থ: সম্পত্তি), মিলি জিলাখনৰ নাম চিৰাং হোৱা বুলি কোৱা হয়।

জিলাখনৰ মুঠ মাটিকালি ১,৯২৩ বৰ্গ কি.মি.। কাজলগাঁও এই জিলাৰ সদৰ। ২০১১ চনৰ লোকপিয়ল অনুসৰি চিৰাং জিলাৰ মুঠ জনসংখ্যা ৪,৮২,১৬২ জন।[1] চিৰাং জিলা অসমৰ দ্বিতীয়খন সৰ্বনিম্ন জনবসতিৰ জিলা। ইউনেস্কোৰ দ্বাৰা স্বীকৃত প্ৰাকৃতিক বিশ্ব ঐতিহ্যবাহী স্থান মানস ৰাষ্ট্ৰীয় উদ্যানৰ কিছু অংশ এই জিলাত অৱস্থিত।

ইতিহাস[সম্পাদনা কৰক]

চিৰাং জিলা আনুষ্ঠানিক ভাৱে গঠন হয় ২০০৪ চনৰ ৪ জুন তাৰিখে।[2] ২০০৩ চনৰ ১০ ফেব্ৰুৱাৰী তাৰিখে ভাৰতৰ কেন্দ্ৰীয় চৰকাৰ, অসম চৰকাৰ আৰু বড়ো লিবাৰেছন টাইগাৰ্ছ (বি.এল.টি)-ৰ মাজত সম্পন্ন হোৱা ত্ৰিপাক্ষিক চুক্তি[3] অনুসৰি বড়ো অধ্যুযিত ৩০৮২ খন গাঁও সাঙুৰি 'বড়োলেণ্ড ক্ষেত্ৰীয় পৰিষদ (বিটিচি)' গঠন কৰাৰ সিদ্ধান্ত লোৱা হয়। আৰু এই সমূহ গাঁওক সংলগ্ন কৰি চাৰিখন জিলা গঠন কৰাৰ সিদ্ধান্ত লোৱা হয়। এই সিদ্ধান্ত মৰ্মেই ৩০ অক্টোবৰ, ২০০৩ তাৰিখৰ নিৰ্দেশ মৰ্মে (নিৰ্দেশ নং- GAG(B). 137/2002/Pt/117) ভাৰতৰ সংবিধানৰ ৩৩২ নং ছেদৰ ষষ্ঠ অনুচ্ছেদৰ অন্তৰ্গত হিচাপে চিৰাং জিলা গঠন কৰা হয়[2] ২০০৪ চনৰ ৪ জুন তাৰিখৰ পৰা জিলা হিচাপে চিৰাঙৰ কাম-কাজ আৰম্ভ কৰা হয়।

জিলা হিচাপে গঠিত হোৱাৰ আগেয়ে চিৰাং জিলাৰ ভূ-ভাগ কোকৰাঝাৰ, বঙাইগাওঁ আৰু বৰপেটা জিলাৰ মাজত বিভাজিত হৈ আছিল। জিলা খনত ৰাজ্যৰ দ্বিতীয়তো ৰাজহুৱা খণ্ডৰ তেল শোধনাগাৰ আৰু পেট্ৰ'ৰাসায়নিক প্ৰকল্প BRPL অৱস্থিত।

ভূগোল[সম্পাদনা কৰক]

চিৰাং জিলা অসমৰ মধ্য-পশ্চিম অংশ আৰু ব্ৰহ্মপুত্ৰৰ উত্তৰ পাৰে অৱস্থিত। বিস্তৃতি উত্তৰ অক্ষাংশ ২৬.২৮°-ৰ পৰা ২৬.৫৪°, আৰু পূৱ দ্ৰাঘিমাংশ ৮৯.৪২°-ৰ পৰা ৯০.০৬°।[2] চিৰাং জিলাৰ উত্তৰে ভূটান (আন্তৰাষ্ট্ৰীয় সীমা), দক্ষিণে বঙাইগাঁও জিলা আৰু কোকৰাঝাৰ জিলাৰ অংশ, পূবে বাক্সা জিলা আৰু বৰপেটা জিলাৰ অংশ বিশেষ আৰু পশ্চিমে কোকৰাঝাৰ জিলা[2]

নামনি ব্ৰহ্মপুত্ৰৰ উত্তৰ উপত্যকাত অৱস্থিত আৰু উত্তৰ সীমাত হিমালয় পাদদেশেৰে আবৃত চিৰাং জিলা মূলতঃ সমভূমি অঞ্চল। জিলাখনৰ উত্তৰ অংশৰ উচ্চতা দক্ষিণৰ অংশতকৈ বেছি। জিলাখনৰ ভূ-ভাগক চাৰিটা কৃষি-পাৰিবেশিক ভাগত ভগোৱা হৈছে:[2]

  • পৰ্বতৰ নামনি উপত্যকা অঞ্চল (Foothills old mountain valley)
  • বানপানী হীন নদীৰে পলসুৱা সমভূমি (Flood-free riverine old allluvial plain)
  • বানপানী আশংকা থকা নদীৰে পলসুৱা সমভূমি (Flood-prone riverine alluvial plain)
  • বিল (beels)

জিলাখনৰ মাজেৰে বৈ যোৱা প্ৰধান উপনৈ সমূহ হৈছে চম্পাৱতী, আই, মানাহ (মানস), আগৰ্ং আৰু কনামাকৰা। আগৰং আৰু কাণামকৰা উপ-উপনৈ জিলাখনৰ মাজেৰে বৈ গৈছে।[4]

তথ্য সংগ্ৰহ[সম্পাদনা কৰক]

  1. 1.0 1.1 census2011. "Chirang District : Census 2011-2018 data". http://www.census2011.co.in/census/district/145-chirang.html। আহৰণ কৰা হৈছে: 31 December 2018. 
  2. 2.0 2.1 2.2 2.3 2.4 চিৰাং জিলাৰ চৰকাৰী ৱেবছাইট. "চিৰাং জিলাৰ বিষয়ে". http://chirang.gov.in/portlets/chirang-at-a-glance। আহৰণ কৰা হৈছে: ৩১ ডিচেম্বৰ ২০১৮. 
  3. BODOLAND TERRITORIAL COUNCIL (BTC) ACCORD, আহৰণ কৰা তাৰিখ: ২৫ জুলাই ২০১২
  4. নতুন অসমীয়া ভূচিত্ৰাৱলী,অসম বুক ডিপি, ২০১১-১২

বাহ্যিক সংযোগ[সম্পাদনা কৰক]