ৱিকিপিডিয়ানৰ মনৰ কথা  |
 সদস্য ফটো ⵓ মৃদুল সিংহ ফুকন।
সকলোকে নমস্কাৰ জনাইছোঁ, এই অভাজনক ছেপ্টেম্বৰ মাহৰ ৱিকিপত্ৰিকাৰ “ৱিকিপিডিয়ানৰ মনৰ কথা” শিতানত দুৱাষাৰ লিখিবলৈ দিয়া বাবে প্ৰথমেই “অসমীয়া ৱিকিপিডিয়া” বা “ৱিকিমিডিয়া সমাজ”ক কৃতজ্ঞতা জ্ঞাপন কৰিলোঁ। পিছে কি লিখিম, ক’ৰ পৰা লিখিম একো উৱাদিহ পোৱা নাই। বাৰু! কিবা এটাৰে আৰম্ভ কৰোঁ। আচলতে কি জানে, ৱিকিপিডিয়াত যোগদান কৰা বহু বছৰেই হ’ল যদিও অভিজ্ঞতাৰ ফালৰ পৰা একেবাৰে নতুন, বহু বছৰ আগতেই অসমীয়া ৱিকিপিডিয়াৰ কথা বাতৰি কাকতত প্ৰকাশিত খবৰৰ যোগে জ্ঞাত হৈছিলোঁ, পিছে ইণ্টাৰনেটৰ সু-ব্যৱস্থা নথকা বাবে দৰ্শন কৰাৰ সৌভাগ্য হোৱা নাছিল। বহু বছৰৰ পিছত ‘টুজি’ (2G) ইণ্টাৰনেট সেৱা উপলব্ধ হোৱাত এদিন ইংৰাজী ৱিকিপিডিয়াত কিবা এটা তথ্য বিচাৰি থাকোঁতে ঘপহকৈ অসমীয়া ৱিকিপিডিয়াৰ কথা মনলৈ আহিল। সেইয়া আছিল ১৮ নৱেম্বৰ, ২০১৩ চনৰ কথা, সেই সময়ত পোনপতীয়াকৈ গুগলত তথ্য বিচাৰি অসমীয়াত টাইপ কৰিবলৈ সুবিধা নথকা বাবে ‘লিপ অফিছ’ত অসমীয়া টাইপ কৰিলৈ সেইয়া ‘কপি’ কৰি গুগলত বিচাৰি চালোঁ আৰু তেনেদৰেই প্ৰথমবাৰৰ বাবে অসমীয়া ৱিকিপিডিয়া দৰ্শন কৰা সৌভাগ্য হ’ল। সেই একেদিনাই ৱিকিপিডিয়াত একাউণ্ট এটাও খোলা হ’ল। অলপ পিছতেই সেইসময়ৰ অন্যতম সক্ৰিয় সদস্য শ্ৰীযুত দীপাংকৰ চেতিয়া দেৱৰ পৰা এটা আদৰণি বাৰ্তা লাভ কৰিলোঁ। সেই বাৰ্তাৰ যোগেদিয়েই “অসমীয়া ৱিকিমিডিয়া সমাজ - Assamese Wikimedia Community” নামৰ ফেচবুক গোটৰ লগত পৰিচিত হ’লোঁ। কিন্তু বহুদিনলৈকে কোনো ধৰণৰ সম্পাদনা কাৰ্যত জড়িত হোৱা নাছিলোঁ। পিছে মাজে মাজে কেতিয়াবা ধুমকেতুৰ দৰে ভূমুকি মাৰি বিভিন্ন তথ্য খুঁচৰিছিলোঁ। প্ৰথম সম্পাদনাটো কৰিছিলোঁ ৮ আগষ্ট, ২০১৫ চনত, সেইদিনা ভূগোলৰ তথ্য এটা বিচাৰি থাকোঁতে অসম্পূৰ্ণ ভূগোলৰ পৃষ্ঠাটো দেখা পাইছিলোঁ। পৃষ্ঠাটোত বিশেষ একো দেখা নাপাই হতাশ হ’লোঁ, মনতে থিৰ কৰিলোঁ যে এই পৃষ্ঠাটো আজি লিখিবলৈ চেষ্টা কৰি চোৱা হওক। অনভিজ্ঞ হোৱা বাবে কেইশাৰী মান বাক্য লিখোঁতেই ক’ব নোৱৰাকৈ তিনিঘণ্টা পাৰ কৰিলোঁ, তথ্যসূত্ৰ দিবলৈ যুঁজ বাগৰ চলিল, বাৰে বাৰে ভুল হ’ল; বুজিলোঁ যে মোৰ দ্বাৰা সম্ভৱ নহ’ব। তথাপিও সেই কেইশাৰী বাক্য লিখিয়েই বন্ধুসকলৰ আগত ৱিকিপিডিয়াৰ লেখক বুলি বিৰাট ফিতাহি এটা মাৰি ফুৰিছিলোঁ। এনেদৰে ১৩ চনৰ পৰা চলি অহা এই ধুমকেতুৰ যাত্ৰা এই বছৰৰ (২০২১ চন) এপ্ৰিলকৈ চলি থাকিল। এপ্ৰিল মাহত হঠাতে ক’ৰ’ণা ভাইৰাছৰ প্ৰকোপ বাঢ়ি কোভিদ ৰোগীৰ সংখ্যা বৃদ্ধি পোৱাৰ ফলত বিদ্যালয়সমূহ বন্ধ হৈ পৰিল। বিদ্যালয়ত সতাঁৰ পাঠদানৰ আৰম্ভ হৈছিল। হাতত পাঠ্যপুথি নথকা বাবে অসুবিধা আহি পৰিল, বহু ক্ষেত্ৰত অসমীয়া ৱিকিপিডিয়াৰ সহায় ল’ব লগা হ’ল। সতাঁৰ পাঠদানৰ প্ৰাতঃ সভাত পাঠ কৰা আজিৰ দিনটোৰ বাবে ইংৰাজী দিনপঞ্জীৰ পৃষ্ঠাত বাৰে বাৰে দৰ্শন কৰিবলৈ ধৰিলোঁ। অসম্পাদিত পৃষ্ঠাবোৰ দেখা পাই নিজে সম্পাদনা কৰিবলৈ ধৰিলোঁ। লাহে লাহে অন্য বিষয়ৰ পৃষ্ঠাবোৰলৈ গতি কৰিলোঁ। এনেদৰে ক’ব নোৱৰাকৈ ৱিকিপিডিয়াৰ মাজত সোমাই পৰিলোঁ। যদিও কোনো পদক বিচাৰি ফুৰা নাছিলোঁ, এই বছৰৰ জুলাই মাহত অসমীয়া ৱিকিমিডিয়া সমাজে “অক্লান্ত কৰ্মী পদক” আগবঢ়ালে। আমাৰ দ্বাৰা ফেচবুকত দিয়া ধন্যবাদ সূচক পোষ্ট এটাৰ যোগেদি ৱিকিপিডিয়াৰ সক্ৰিয় আৰু অভিজ্ঞ সদস্যসকলৰ সৈতে চছিয়েল মিডিয়াৰ যোগে পৰিচিত হ’লোঁ আৰু সেই মাহৰে প্ৰথম সপ্তাহত অসমীয়া ৱিকিমিডিয়া সমাজৰ হোৱাটছ এপ্ গোটতো সোমাই পৰিলোঁ। তেওঁলোকৰ পৰা ৱিকিপিডিয়া সম্পাদনাৰ সম্পৰ্কে নিতৌ ন ন কথা শিকিছোঁ। গতিকে ধন্য হৈছোঁ আৰু ধন্যবাদ দিছোঁ। এইয়া আছিল আমাৰ অসমীয়া ৱিকিপিডিয়াৰ লগত জড়িতকৰণ।
আনহাতে অনুভৱ হিচাপে ক’বলৈ গ’লে ৱিকিপিডিয়াত লিখাটো এক প্ৰকাৰৰ আচৰিত নিচা, এক বুজাব নোৱৰা আত্মপ্ৰসাদ, এই নিচা দিনে দিনে বাঢ়ি গৈয়ে আছে। যিসকলে এই নিচাত আসক্ত হৈছে তেওঁলোকে জ্ঞাত-অজ্ঞাতভাৱে অসমীয়া ভাষাটোৰ মেৰুদণ্ড মজবুত কৰি তোলাত বৃহৎ অৰিহণা যোগাইছে। এইয়া হৈছে নিজ মাতৃভাষাক সেৱা কৰাৰ এক সুৱৰ্ণ সুযোগ। সকলো অসমীয়া বিদ্বান লোকেই এই মহৎ কাৰ্যলৈ ধাৱমান হোৱা উচিত। ৱিকিপিডিয়াত থকা অফুৰন্ত তথ্যই তথ্য বা জ্ঞান-পিপাসুসকলৰ তথ্য বা জ্ঞানৰ ক্ষুধা নিবাৰণ কৰিছে। ছাত্ৰ-ছাত্ৰী, গৱেষক, শিক্ষক আৰু প্ৰতিযোগিতামূলক পৰীক্ষাৰ প্ৰাৰ্থীসকলৰ সাৰথি হৈছে। ক’বলৈ গ’লে এইয়া অসমীয়া ভাষাৰ “ডিজিটেল জাগৰণ”। এই মহান কাৰ্যত জড়িত সকলোকে কোটি কোটি প্ৰণিপাত জনাইছোঁ। কিন্তু অসমীয়া ৱিকিপিডিয়াৰ “ডিজিটেল জাগৰণ” এতিয়াও সুপ্ত অৱস্থাত। জানিবলৈ পাইছোঁ যে, বৰ্তমানলৈকে অসমীয়া ৱিকিপিডিয়াত পঞ্জীভূত সদস্যৰ সংখ্যা ৩০,৭৪১জন আৰু সক্ৰিয় সদস্যৰ সংখ্যা প্ৰায় ১০০জনৰ আগে-পিছে আছে। অৰ্থাৎ মুঠ সদস্যৰ মাত্ৰ ০.৩৩ শতাংশ সদস্যহে সক্ৰিয়, ফলত অন্য ভাষাৰ তুলনাত আমি বহুত পিছত, এইয়া মুঠেই ভাল খবৰ নহয় বুলি ভাবোঁ। গতিকে সকলোকে সক্ৰিয় হ’বলৈ অনুৰোধ জনালোঁ। এই ক্ষেত্ৰত সচেতনতা সকলোৱে আছে বুলি অনুভৱ কৰোঁ। কিন্তু আমাক প্ৰয়োজন হৈছে “জাগ্ৰত জাগৰণৰ”। আশা ৰাখিছোঁ এই “জাগ্ৰত জাগৰণ” সোনকালেই আহক, অসমীয়া ভাষাৰ “ডিজিটেল জাগৰণৰ” অগ্ৰগতি হওক। তেহে হ’ব পাৰিম আমি প্ৰকৃত অসমীয়া জাতীয়তাবাদী। ধন্যবাদ।
|
ভাল প্ৰবন্ধ |
গেম অফ থ্ৰোনছ (ইংৰাজী: Game of Thrones) হৈছে এইচবিঅ'ৰ বাবে ডেভিদ বেনিঅ'ফ আৰু ডেনিয়েল ব্ৰেট ৱেইছৰদ্বাৰা সৃষ্ট এখন ইংৰাজী ভাষাৰ আমেৰিকান ফেণ্টাচী ড্ৰামা টেলিভিছন শৃংখলা। ই জৰ্জ আৰ. আৰ. মাৰ্টিনৰ এক কাল্পনিক উপন্যাস শৃংখলা এ ছং অফ আইচ এণ্ড ফায়াৰৰ এক টেলিভিছন অভিযোজন। মাৰ্টিনৰ শৃংখলাটোৰ প্ৰথমখন গ্ৰন্থ হৈছে এ গেম অফ থ্ৰোনছ। গেম অফ থ্ৰোনছৰ দৃশ্যগ্ৰহণ যুক্তৰাজ্য, কানাডা, ক্ৰোৱেছিয়া, আইচলেণ্ড, মালটা, মৰক্কো আৰু স্পেইনত সম্পন্ন কৰা হৈছিল। ২০১১ চনৰ ১৭ এপ্ৰিল তাৰিখে আমেৰিকা যুক্তৰাষ্ট্ৰৰ এইচবিঅ'ত প্ৰিমিয়াৰ হোৱা শৃংখলাটো ২০১৯ চনৰ ১৯ মে' তাৰিখে সমাপ্ত হয়। আঠটা ছিজনৰ শৃংখলাটোত মুঠ ৭৩টা খণ্ড সম্প্ৰচাৰিত হয়।
ৱেষ্টেৰোচ আৰু এছ'ছ নামৰ কাল্পনিক মহাদেশৰ পটভূমিত ৰচিত আৰু নিৰ্মিত গেম অফ থ্ৰোনছত কলাকুশলীৰ এক বৃহৎ গোট আছিল। গোটেই কালছোৱাত শৃংখলাটোৱে সমান্তৰালভাৱে কাহিনীৰ কেইবাটাও মোৰক আগবঢ়াই লৈ যায়। প্ৰথম আৰু মুখ্য কাহিনীটো ৱেষ্টেৰোচৰ সাতখন ৰাজ্যৰ আইৰন থ্ৰোন বা লৌহ সিংহাসনক কেন্দ্ৰ কৰি সম্ভ্ৰান্ত পৰিয়ালবোৰৰ মাজত ৰাজনৈতিক সংঘাতৰ বিষয়ে দেখুওৱা হৈছে। ক্ষমতাত অধিষ্ঠিত ৰাজপৰিয়ালৰ সাৰ্বভৌমতা অক্ষুণ্ণ ৰখাৰ প্ৰচেষ্টা আৰু অন্যান্য সম্ভ্ৰান্ত পৰিয়ালসমূহৰ মাজত সিংহাসনৰ প্ৰতিদ্বন্দ্বিতাকে ইয়াত মূলতঃ উপস্থাপন কৰা হৈছে। কাহিনীৰ দ্বিতীয়টো মোৰত ৰাজ্যৰ ক্ষমতাচ্যুত ৰাজবংশৰ অন্তিম বংশধৰৰ ওপৰত গুৰুত্ব দিয়া হৈছে। তেওঁক এছ'ছলৈ নিৰ্বাসিত কৰা হৈছে যদিও তেওঁ পুনৰ সিংহাসন পুনৰুদ্ধাৰ কৰাৰ ষড়যন্ত্ৰ কৰি আছে। তৃতীয়টো ভাগত ৱেষ্টেৰোচৰ উত্তৰ সীমান্তৰ বহিৰাগত ভাবুকিৰ বিৰুদ্ধে ৰাজ্যখনক ৰক্ষা কৰা এক সামৰিক বাহিনী নাইটচ ৱাটচৰ কথা উপস্থাপন কৰা হৈছে। ইয়াত বিতংকৈ পঢ়ক
যোৱা মাহৰ ভাল প্ৰবন্ধ তাৰাৰ বিষয়ে ইয়াত পঢ়ক |
আগষ্ট-২০২১ত সৃষ্টি কৰা প্ৰবন্ধসমূহ |
মুঠ প্ৰবন্ধৰ সংখ্যা = ৮৩
|
|
|
নিৰ্বাচিত চিত্ৰ |
এবিধ বিলুপ্তপ্ৰায় খেতিৰ সঁজুলি, দোণ। বাঁহৰ সৰুকৈ তোলা কাঠিৰে বোৱা আৰু বেতৰ তমালেৰে গাঁঠি দি তৈয়াৰ কৰা দোণ হৈছে সৰু খৰাহী আকৃতিৰ এবিধ সামগ্ৰী। ইয়াৰ সহায়ত ধান জোখা হৈছিল।
আলোকচিত্ৰ শিল্পী: প্ৰণৱ জ্যোতি |
পদক |
|
|
উল্লেখনীয় কাম |
- অসমীয়া ৱিকিপিডিয়াত লেখাৰ সংখ্যা ৯০৮৯ টালৈ বৃদ্ধি পালে।
- অসমীয়া ৱিকিউৎসত উপলব্ধ গ্ৰন্থৰ সংখ্যা ৩৪৪ খনলৈ বৃদ্ধি পালে।
* অসমীয়া ৱিকিউৎসত শেহতীয়াকৈ সম্পূৰ্ণ হোৱা গ্ৰন্থৰ তালিকা:
- অমূল্য ৰত্ন (লেখক: মাধৱদেৱ, ১৯৪৭)
- অসমিয়া লৰাৰ মিত্ৰ (লেখক: আনন্দৰাম ঢেকিয়াল ফুকন, ১৮৪৯)
- এজন ডাক্তৰৰ কবিতা (লেখক: ৰাজীৱ কুমাৰ শৰ্মা, ২০১৭)
- কঃ পন্থাঃ (লেখক: কমলাকান্ত ভট্টাচাৰ্য্য, ১৯১৯)
- কালিকা পুৰাণ বা হৰ-গৌৰীৰ বিবাহ (লেখক: অজ্ঞাত, ১৯৫২)
- গদাধৰ (লেখক: পদ্মনাথ গোহাঞিবৰুৱা, ১৯০৭)
- চাকৰি ক’তেনো পাম (লেখক: হেমন্ত কুমাৰ শৰ্মা, ২০১৯)
- চাণক্য (লেখক: ৰামপতি, ১৯১৩)
- জলকীয়াৰ পুনৰ্জীৱন অভিযান আৰু অন্যান্য (লেখক: সুৰেন গোস্বামী, ২০২১)
- দিহা নামৰ সম্ভাৰ (লেখক: মনােমতী বড়া, ২০১০)
- নতুন ধাৰাপাত (লেখক: ত্ৰিদশ পাঠক, ১৯৭৪)
- নিবেদন (লেখক: দুৰ্গেশ্বৰ শৰ্মা, ১৯১৫)
- বনেৰ মৰে চ'ৰা কবিতা (লেখক: হানিফ আলী, ২০২১)
- বনৰ বন্ধুৰ মনৰ খবৰ (লেখক: জীৱন মাধুৰী নেওগ বৰা, ১৯৯৮)
- বাৰাংগণাৰ জুপুৰি (লেখক: পৰী পাৰবীন, ২০১৯)
- বিৰাট পৰ্ব্ব (লেখক: কংসাৰি দেব, ১৯২৩)
- ভবিষ্যত কথা বা সন্ত-চৰিত (লেখক: কবিচন্দ্ৰ, ১৯৩১)
- মাটিৰ চাকিৰ শিখা (লেখক: হিৰণ্ময়ী দেৱী, ১৯৭৯)
- শব্দৰ এলজোলামবোৰ নৈঋতলৈ বুলি (লেখক: পৰী পাৰবীন, ২০১৬)
- শিল্পীপ্ৰাণ উমেশ বৈশ্য (লেখক: শেখৰ জ্যোতি বৈশ্য, ২০১৮)
- শ্ৰীশ্ৰীচণ্ডী (লেখক: বিপ্ৰ ৰুচিনাথ, অজ্ঞাত)
- ৰহঘৰা (দণ্ডিনাথ কলিতা) (লেখক: দণ্ডিনাথ কলিতা, ১৮৬৬ )
- ৰহস্যময় ভাৰত (লেখক: অংশুমান হাজৰিকা, ২০১৯)
- ৰাম নিৰঞ্জন ভকতি প্ৰৱাহ (লেখক: মনোমতী বড়া, ২০১৩)
- সন্তসাৰ (লেখক: ৰমানন্দ, ১৯১৫)
- স্বাগতম পৰীক্ষা (লেখক: জয়ন্ত কুমাৰ শৰ্মা, ১৯৯৬)
- সাধনা (লেখক: দণ্ডিনাথ কলিতা, ১৯২৮)
- সুৰ বিচাৰি বাৰ বছৰ (লেখক: উমেশ বৈশ্য, ২০১০)
- হাতেম তাই (লেখক: নবীনচন্দ্ৰ বৰদলৈ, ১৯৬১)
- হিৰণ্ময়ী দেৱীৰ বিভিন্ন অনুভৱ (লেখক: হিৰণ্ময়ী দেৱী, ১৯৯৯)
- হৃদয়ৰ অৰণ্যত (লেখক: হিৰণ্ময়ী দেৱী, ১৯৯০)
- সীতা হৰণ নাটক (লেখক: দুগ্ধনাথ খাউন্দ, ১৯০৮)
- অসমীয়া সাহিত্যৰ চানেকি (দ্বিতীয় খণ্ড, চতুৰ্থ ভাগ) (লেখক: সন্মিলিত, ১৯১০)
- চন্দ্ৰাৱলী (লেখক: দুৰ্গেশ্বৰ শৰ্মা, ১৯২৪)
- মহাপুৰুষ শ্ৰীশ্ৰীশঙ্কৰদেৱ-মাধৱদেৱ চৰিত (লেখক: দৈত্যাৰি ঠাকুৰ, ১৯৩৭)
- নামতি (লেখক: দুৰ্গানাথ বৰুৱা, ১৯৪৮)
- ভগৱান বুদ্ধ (লেখক: ধৰ্ম্মানন্দ কোসম্বী, ১৯৫৯)
- শিয়ালা বৈষ্ণৱৰ চৰিত্ৰ (লেখক: কবি সুচণ্ডাই, ১৯২৮)
- শ্ৰীশ্ৰীশঙ্কৰদেৱ (লেখক: ভূষণ দ্বিজ কবি, ১৯২৫)
- শ্ৰীৰাম-কীৰ্ত্তন বা অনন্ত ৰামায়ণ (লেখক: অনন্ত ঠাকুৰ আতা, ১৯২৫)
- ৰূদ্ৰ যামল (লেখক: পুৰুষোত্তম, ১৯০৮)
|
পৰিসংখ্যা আৰু অন্যান্য |
পৰিসংখ্যা
অন্যান্য সংযোগ
ঘোষণা
|
|
.svg){kind=small}
.png){kind=small}
.svg){kind=icon}
_-_The_Noun_Project.svg){kind=small}
