ৱিকিমিডিয়ান: হানিফ আলীআমাৰ অতি আদৰৰ বিহু উৎসৱটি এইবেলি পালন নকৰাকৈ থকাৰ বেদনা কেৱল অসমীয়াইহে জানে! অৱশ্যে বাধ্যত পৰিহে এইবেলি আমি ত্যাগ দিবলগীয়া হৈছে। সেই তেতিয়াৰে পৰাই মনৰ মাজত লুকাই থকা অবুজ সুখটো কোনোবাই কাঢ়ি লোৱা যেন অনুভৱ হৈছে। প্ৰতি বছৰৰ দৰে যদিও মনত তেনে আনন্দ নাই, তথাপি মোৰ তৰফৰ পৰা সকলো অসমবাসী তথা বিশ্ববাসীলৈ পবিত্ৰ
ঈদ-উল-আজহাৰ হিয়াভৰা শুভেচ্ছা যাচিলোঁ।
পৃথিৱীত জন্ম লাভ কৰা তিনিমাহৰ কেঁচুৱাৰ দৰে ময়ো ৱিকিপিডিয়াৰ তিনি-চাৰি মাহমান বয়সৰ এজন সদস্য। ইমান কম সময়ত মনৰ কথা লিখিবলৈ পাই অতিকৈ সুখ অনুভৱ কৰিছোঁ। যদিও গধুৰ কথাৰে মনৰ ভাব প্ৰকাশ কৰাৰ ক্ষমতা মোৰ নাই, তথাপিও মোৰ অসমীয়া ৱিকিপিডিয়ালৈ যাত্ৰাৰ দুআষাৰ –
২০১৭ চনৰ জানুৱাৰী মাহত এজন ব্যক্তিৰ বিষয়ে জানিবৰ বাবে গুগলত সন্ধান কৰিছিলোঁ। নামটোৰ লগতে Wikipedia বুলিও লিখা আহিল। তাত ক্লিক কৰি সেই ব্যক্তিজনৰ বিষয়ে পঢ়িলোঁ। পিছে ইংৰাজী ভাষাত বুজিবলৈ মোৰ বাবে কঠিন আছিল। তেতিয়াই বাঁওফালে ‘ভাষা’ নামৰ এটা বুটাম দেখিলোঁ, তাত ক্লিক কৰি বঙালী ভাষাটো চিলেক্ট কৰি কেইবাটাও পঢ়িলোঁ। তাৰ পিছৰ পৰাই কিবা জানিবলৈ হ’লে পোনপটীয়াকৈ ৱিকিত সোমাই যাওঁ। তেতিয়াৰ পৰাই ভাবিবলৈ ধৰিলোঁ যে, এই প্ৰবন্ধবোৰ কোনে লিখিছে? পিছে বঙালী ভাষাত পঢ়ি তেনে তৃপ্তি পোৱা নাছিলোঁ। ২০১৮ চনত অসমীয়া ভাষাত সন্ধান কৰি দেখিলোঁ যে অসমীয়াতো বহুখিনি পোৱা যায়। কিন্তু বেছিভাগেই নাই! পাচপাকতে বেটুপাতলৈ আহি ৱিকিপিডিয়াৰ বিষয়ে অলপ জানিলোঁ আৰু বুজি পাইছিলোঁ যে, তাত সকলোৱেই সম্পাদনা, লিখা-মেলা কৰিব পাৰে। পিছে সেই বঙালী ৱিকিপিডিয়াৰ একাউণ্টটোৰেই লগ ইন কৰিলোঁ। কিন্তু একো লিখিব নোৱাৰিলোঁ। কেনেকৈ লিখে, কি লিখে একো বুজি পোৱা নাছিলোঁ। কেৱল এইখিনিহে গম পাইছিলোঁ যে সকলোৱে লিখিব পাৰে। গতিকে মই কেৱল প্ৰয়োজনীয় প্ৰবন্ধবোৰ পঢ়ি গৈ থাকিলোঁ।
দুটাকৈ বছৰ পাৰ হৈ গ’ল, অৰ্থাৎ ২০২০ চন আহিল। এতিয়াও অসমীয়াত বহুত প্ৰবন্ধ বিচাৰি পোৱা নাই। মই ভাবিলোঁ! পামনো কেনেকৈ? মোৰ দৰে সকলোৱে বহি থাকিলে কেনেকৈ বিচাৰি পাম? পিছে ২০২০ চনৰ ১৪ জানুৱাৰীত এটা পৃষ্ঠা সৃষ্টি কৰিবলৈ চেষ্টা কৰিলোঁ। এদিনাখন এটা পৃষ্ঠাৰ দুটা শাৰী অনুবাদ কৰি থৈ দিলোঁ। অলপ পৰৰ পিছত ই-মেইল এটা আহিল যে, 'পাণবজাৰ' নামৰ পৃষ্ঠাটো অজয় দাসৰ দ্বাৰা স্থানান্তৰ কৰা হ’ল। তেতিয়া মই অজয় দাসৰ লগত যোগাযোগ কৰিলোঁ আৰু ৱিকিপিডিয়াৰ বিষয়বোৰ এটা দুটাকৈ শিকিবলৈ ধৰিলোঁ। ৱিকিপিডিয়াত কাম কৰাৰ বাবে অজয় দাসে মোক বৰকৈ সহায় কৰিছে। যদিও এতিয়াও বহুত শিকিবলৈ বাকী আছে। অৱশ্যে আজিকালি শিকিবলৈও বৰ সহজ হৈ গৈছে। যেনেঃ ইউটিউব ভিডিঅ’, হোৱাটচএপ গ্ৰুপ, ফেচবুক গ্ৰুপ ইত্যাদি ছ’চিয়েল মিডিয়াৰ দ্বাৰা বৰ সহজে শিকিব পৰা যায়। শেহতীয়াকৈ মই হোৱাটচএপৰ দ্বাৰা ৱিকিউৎস-ত কাম কৰা শিকিলোঁ। এই ক্ষেত্ৰত ভাস্কৰ দা, গীতাৰ্থ দা, অজয় দাস আৰু কেইবাজনেও সহায় আগবঢ়াইছে।
অসমীয়া ৱিকিপিডিয়াত লৈংগিক ব্যৱধানৰ উন্নতি কৰা আৰু দক্ষিণ এছিয়াৰ নাৰীৰ বিষয়ে জীৱনীমূলক প্ৰবন্ধ সৃষ্টি কৰাৰ উদ্দেশ্যেৰে ১ ফেব্ৰুৱাৰী ২০২০ - ৩১ মাৰ্চ ২০২০ লৈ অনুষ্ঠিত হোৱা অনলাইন প্ৰবন্ধ ৰচনা প্ৰতিযোগিতা ( ৱিকিপিডিয়া:ৱিকি লাভ্ছ ৱুমেন দক্ষিণ এছিয়া ২০২০) -ত অংশ গ্ৰহণ কৰিলোঁ। তাত অংশগ্ৰহণ কৰি মই ৩১টা নতুন প্ৰবন্ধ সৃষ্টি কৰি তৃতীয় স্থানত আছিলোঁ। য’ত প্ৰথম স্থানত আছিল – অজয় দাস, দ্বিতীয় স্থানত- ঈশান জ্যোতি বৰা। এই প্ৰতিযোগিতাই মোৰ মনত বৰকৈ আগ্ৰহ জগাই তুলিছিল। যদিও নতুন সদস্য হৈ প্ৰতিযোগিতা কৰা মোৰ বাবে ইমান সহজ নাছিল। তথাপিও বহু ভুল-ত্ৰুটিৰ মাজেৰে আগবাঢ়ি গৈ আছিলোঁ।
মোৰ এনে কাম চাই বহুতে প্ৰশ্ন কৰে, “ৱিকিপিডিয়াত কাম কৰি তোমাৰ কি লাভ?” মই তেওঁলোকক এটাই উত্তৰ দিওঁ যে, ঘৰৰ কাম যিদৰে বাহিৰৰ মানুহে নকৰে আৰু ঘৰৰ কাম কৰোঁতে কোনোবাই লাভ-লোকচান নেদেখে ঠিক সেই দৰে এই কামটোও ঘৰৰ কামৰ নিচিনা। আজিলৈকে আমাৰ অসমীয়া ৱিকিত ২০০-ৰ অধিক সদস্য দেখিবলৈ পোৱা যায়। কিন্তু তাৰ ভিতৰত সক্ৰিয় সদস্য অতি কম। বাকী একাউণ্ট বিলাক এনেই পৰি আছে। যদি প্ৰতিজন সদস্যই মাহত এটাকৈয়ো প্ৰবন্ধৰ সৃষ্টি কৰে তেন্তে মাহত ২০০ৰো অধিক প্ৰবন্ধ হৈ যাব। তেন্তে অসমীয়া ৱিকিপিডিয়াই উন্নতি কৰোঁতে কিমান দিন লাগিব?
সদৌ শেষত মই তেওঁলোকক আহ্বান জনাওঁঁ, যিসকলে বিচাৰিলে এতিয়াও আমাক সহায় কৰিব পাৰে। সহায় আগবঢ়াব পাৰে অসমীয়া জাতিলৈ। সহায় কৰিব পাৰে ইণ্টাৰনেট জগতত অসমীয়া ভাষাৰ উন্নতি কৰিবলৈ। বেছিকৈ নোৱাৰিলেও প্ৰতি মাহে এটা নতুন প্ৰবন্ধ লিখি বা অনুবাদৰে অসমীয়া ভাষাক ইণ্টাৰনেটৰ জগতত সমৃদ্ধ কৰক। সকলোকে ধন্যবাদ জনাই মোৰ মনৰ কথা ইয়াতেই সামৰিছোঁ।
জয় হিন্দ
জয় আই অসম।
হানিফ আলী (talk) 12:01, 31 July 2020 (ইউ.টি.চি.)[উত্তৰ দিয়ক]
.svg){kind=icon}
_-_The_Noun_Project.svg){kind=small}
