ৰুমী বৰা
২০১৩ চনতে মোক অসমীয়া ৱিকিপিডিয়াৰ সৈতে প্ৰথম চিনাকি কৰাই দিছিল মোৰ ছোৱালী জলিয়ে। তাইৰ পৰাই দুই এটা কথা শিকি বিভিন্ন কিতাপ-আলোচনীত পোৱা তথ্যবোৰ লৈ ৱিকিপিডিয়াত প্ৰবন্ধ লিখিছিলোঁ। তেতিয়া ৱিকিউৎসৰ তেনেই চালুকীয়া অৱস্থা। ময়ো অন্য বহুতৰ দৰে ৱিকিপিডিয়াৰ প্ৰবন্ধ পাতি উন্নত কৰাতে লাগিছিলোঁ। প্ৰান্তিকৰ দৰে আলোচনী-পত্ৰ আৰু ছোৱালীকেইজনীৰ কলেজৰ পাঠ্যপুথি আদিও খুঁচৰি ৱিকিপিডিয়াত প্ৰবন্ধ লিখিবলৈ যত্ন কৰিছিলোঁ। সেই সময়ত বিভিন্ন কাম-কাজত ৱিকিপিডিয়াৰ সক্ৰিয় সদস্য বিষ্ণু শইকীয়া, গীতাৰ্থ বৰদলৈ, প্ৰভাকৰ শৰ্মা নেওগ আদিয়ে সহায়-পৰামৰ্শ আগবঢ়াইছিল। তেতিয়াৰ পৰাই ৱিকিত এটা আসক্তি সোমাল। পিছে কিছুদিন লগাৰ পিছতে মোৰ ব্যক্তিগত অসুবিধাৰ বাবে ৱিকিৰ কামত বিৰতি পৰিল। কিন্তু মনত সদায়েই দোষী দোষী ভাব এটাই আমনি কৰি আছিল। বহুবছৰৰ বিৰতিৰ অন্তত এইবছৰ লকডাউনৰ সময়ত ৱিকিউৎসত পুনৰ যোগ দিলোঁ। মৃদুল কুমাৰ শৰ্মাই মোৰ একাউণ্টটোত লগ ইন কৰিব পৰা কৰি দিলে। প্ৰথমতে ৱিকিউৎসৰ কিছুমান কামত থোতামোজা লাগিলেও অভিজ্ঞ সদস্যসকলে সকলো সময়তে শিকাই বুজাই দিয়াত আৰম্ভ কৰিবলৈ সুবিধা পালোঁ। অনলাইন ৱেবিনাৰ কেইবাখনতো যোগ দিও সক্ৰিয় সদস্যসকলৰ পৰা নুবুজাবোৰ শিকি ল’লোঁ। আগৰ দৰেই অসমীয়া ৱিকি সমাজৰ সহায়-সহযোগিতাই উৎসাহ দিলে, নিজৰ সামৰ্থ্যৰে ৱিকিৰ বাবে আৰু অসমীয়া ভাষাটোৰ বাবে অৱদান আগবঢ়াবলৈ।
যোৱা নৱেম্বৰ মাহত অনুষ্ঠিত হোৱা ভাৰতীয় ৱিকিউৎসৰ অনলাইন মুদ্ৰণ সংশোধন ২০২০ প্ৰতিযোগিতাত যোগদান কৰি পুনৰ শৈশৱ ঘূৰাই পোৱা যেন লাগিল। দিনত ঘৰ-সংসাৰৰ লেঠাবোৰ যিমান পাৰি সোনকালে সামৰি লেপটপৰ ওচৰ পাওঁহি। ৰাতি দুই-তিনি বজালৈকে যেতিয়া ৱিকিৰ সদস্যসকলে কাম কৰি থাকে, তাকে দেখি মোৰো টোপনি পলাই পত্ৰং দিয়ে। প্ৰত্যেক দিনাই এশ পৃষ্ঠাকৈ কৰিম বুলি লৈছিলোঁ যদিও প্ৰথম দুদিনমানৰ পিছত স্বাস্থ্য আৰু সময়ে নটনাত পঞ্চাশ-ষাঠি পৃষ্ঠা কৰিয়ে সামৰিব লগা হৈছিল। সকলোৱেই এইবাৰ বৰ উৎসাহেৰে কাম কৰা দেখিলোঁ। প্ৰায়ে মই মুদ্ৰণ সংশোধন কৰি উঠাৰ পিছতে কোনোবা এগৰাকীয়ে লগে লগে বৈধকৰণ কৰি পেলোৱা দেখি ভাল লাগিছিল আৰু একেৰাহে লাগি থাকিবলৈ প্ৰেৰণা পাইছিলোঁ। ভাৰতৰ অন্য ভাষাৰ ৱিকিউৎসসমূহৰ লগত আমি ফেৰ মাৰিব লাগিবই বুলি সেইকেইদিন সকলোৱে সাধ্যানুসৰি লাগিছিল। মাথোঁ পোন্ধৰ দিনতে ত্ৰিছৰো অধিকসংখ্যক কিতাপৰ মুদ্ৰণ সংশোধন কৰি অসমীয়া ৱিকিউৎসই সৰ্বভাৰতীয় পৰ্য্যায়ত তৃতীয় স্থান লাভ কৰাত খুবেই সুখী হৈ উঠিলোঁ আৰু অসমীয়া ৱিকিমিডিয়ান হিচাপে গৌৰৱো অনুভৱ কৰিলোঁ।
ৱিকিত কিয় লিখোঁ বুলি বহুতে মোক সোধে। তাৰ উত্তৰত মই কওঁ, গৃহিনী হিচাপে জীৱনৰ বহু সময় ঘৰ-সংসাৰৰ দায়িত্ব পালন কৰিলোঁ। এতিয়া মোৰ ছোৱালী কেইজনী নিজৰ ভৰিত থিয় দিছে, গতিকে ঘৰুৱা দায়িত্ব কিছু লাঘৱ হৈছে। ৱিকিত কাম কৰিবৰ বাবেই সিহঁতে মোক এটা লেপটপো উপহাৰ দিছে। গতিকে এতিয়া মোৰ ভাল লগা ৱিকিৰ কামবোৰ কৰি অসমীয়া ভাষাৰ বাবে অলপ হ’লেও অৱদান আগবঢ়োৱাৰ চেষ্টা কৰিছোঁ। যোৱা কেইমাহত ৱিকিউৎসত মুদ্ৰণ সংশোধনৰ কামবোৰ কৰোঁতে পুৰণি কিতাপ কিছুমান পঢ়া হৈছে, যিবিলাক কিতাপ পঢ়িবলৈ হয়তো বিচাৰিয়েই নাপালোঁহেঁতেন। কিছুমান মানুহে সোধে, বিনা পাৰিশ্ৰমিকে অযথা সময় খৰচ কৰা হয় নেকি বুলি। কিন্তু ৱিকিত কাম কৰিবলৈ ল’লেহে গম পোৱা যায় ইয়াৰ মৰ্মাৰ্থ। যিকোনো ঠাইৰ পৰাই সময়-সুবিধা মিলাই নিজৰ ভাষাটোৰ কাৰণে কিবা অলপ কৰি, নতুন কথা কিছুমান জানি আৰু অসমীয়া ৱিকি সমাজৰ বহু অক্লান্ত কৰ্মীৰ সৈতে একেলগে কাম কৰি এটা অনন্য সন্তুষ্টি পাওঁ। সেয়াই মোৰ বাবে মূল অনুপ্ৰেৰণা।
সময় গতিশীল, কেতিয়াও থমকি নৰয়। সমগ্ৰ পৃথিৱীক স্থৱিৰ কৰি পেলোৱা ২০২০ চনে মেলানি মাগিলে। নতুন উদ্যমেৰে আমি ২০২১ চনক আদৰি আগুৱাই যাব লাগিব। আশাকৰোঁ, নতুন বছৰটোৱে সংকটৰ ক’লা ডাৱৰজাক আঁতৰাই আশাৰ বতৰা আনিব, অসমীয়া ভাষাক ডিজিটেল পৃথিৱীত আগুৱাই নিবলৈ সকলো অসমীয়াই হাত উজান দিব আৰু অসমীয়া ৱিকিপিডিয়া আৰু ৱিকিউৎস নতুন ৰূপেৰে সমৃদ্ধ হৈ উঠিব। নতুন বছৰৰ দুৱাৰদলিতে ’মনৰ কথা’ লিখিবলৈ সুযোগ দিয়াৰ বাবে সকলো ৱিকিপিডিয়ানলৈ ধন্যবাদ জ্ঞাপন কৰিছোঁ আৰু নতুন বছৰৰ আন্তৰিক শুভেচ্ছাও যাঁচিছোঁ।
নতুন বছৰৰ আৰম্ভণিতে সকলোকে আহ্বান জনাইছোঁ, আহক, আমি দিনটোৰ দহমিনিট সময় হ’লেও নিজৰ মাতৃভাষাৰ বাবে উচৰ্গিত কৰোঁ।
Rumi Borah~aswiki (talk) 16:39, 30 December 2020 (ইউ.টি.চি.)[উত্তৰ দিয়ক]
.svg){kind=icon}
_-_The_Noun_Project.svg){kind=small}
