হেম বৰুৱা (ত্যাগবীৰ)

এই প্ৰবন্ধটো অসমৰ স্বাধীনতা সংগ্ৰামী ত্যাগবীৰ হেম বৰুৱাৰ বিষয়ে। আন ব্যৱহাৰৰ বাবে হেম বৰুৱা (দ্ব্যৰ্থতা দূৰীকৰণ পৃষ্ঠা) চাওক।

ত্যাগবীৰ হেমচন্দ্ৰ বৰুৱা
তেজপুৰৰ হেমভৱনৰ আৰু ইয়াৰ সন্মুখত থকা ত্যাগবীৰ হেমচন্দ্ৰ বৰুৱাৰ আৱক্ষ মূৰ্ত্তি
জন্ম	২৫ এপ্ৰিল, ১৮৯৩ তেজপুৰ, শোণিতপুৰ, অসম
মৃত্যু	১১ আগষ্ট, ১৯৪৫ গুৱাহাটী, অসম
পেচা	সাহিত্যিক, সমাজসেৱক, স্বাধীনতা সংগ্ৰামী
ভাষা	অসমীয়া
ৰাষ্ট্ৰীয়তা	ভাৰতীয়
নাগৰিকত্ব	ভাৰত
শিক্ষা	বি.এ. (১৯১৯) বি.এল. (১৯২৫)
মাতৃশিক্ষায়তন	কটন মহাবিদ্যালয়
সাহিত্যিক বিপ্লৱ	ভাৰতৰ স্বাধীনতা আন্দোলন, ১৯৪২ৰ গণ আন্দোলন
আত্মীয়-স্বজন	পোৱাল চন্দ্ৰ বৰুৱা (পিতৃ) পদ্মাৱতী বৰুৱা (মাতৃ)

হেমচন্দ্ৰ বৰুৱা (ইংৰাজী: Hemchandra Barua; ১৮৯৩ – ১৯৪৫) অসমৰ এজন প্ৰসিদ্ধ স্বাধীনতা সংগ্ৰামী, সমাজসেৱক আৰু সাহিত্যিক আছিল। অসমীয়া সমাজ জীৱনত তেখেতে আগবঢ়াই যোৱা সমাজ সেৱাৰ বাবে তেওঁক ত্যাগবীৰ উপাধিৰে বিভূষিত কৰা হৈছিল।

চমু জীৱনী

১৮৯৩ চনৰ ২৫ এপ্ৰিলত শোণিতপুৰ জিলাৰ সদৰ তেজপুৰত হেমচন্দ্ৰ বৰুৱাৰ জন্ম হৈছিল। পিতৃৰ নাম পোৱাল চন্দ্ৰ বৰুৱা আৰু মাতৃৰ নাম পদ্মাৱতী বৰুৱা। ১৯১৫ চনত বৰপেটা উচ্চ মাধ্যমিক বিদ্যালয়ৰ পৰা প্ৰৱেশিকা পৰীক্ষাত উত্তীৰ্ণ হোৱাৰ পাছত ১৯১৯ চনত কটন মহাবিদ্যালয়ৰ পৰা ইংৰাজী বিষয়ত সন্মানসহ স্নাতকোত্তৰ পৰীক্ষাত উত্তীৰ্ণ হয়। ১৯২১ চনত মহাত্মা গান্ধীৰ আহ্বানত মহাবিদ্যালয় বৰ্জন কৰে। পৰৱৰ্তী কালত ১৯২৫ চনত কলিকতালৈ গৈ আইনৰ শিক্ষা সম্পূৰ্ণ কৰি বি.এল. উপাধি লাভ কৰে।

কৰ্মজীৱন

ছাত্ৰাৱস্থাৰে পৰা বৰুৱাই সমাজৰ বিভিন্ন জনহিতকৰ কামত আত্মনিয়োগ কৰিছিল। ভাৰতীয় স্বাধীনতা আন্দোলনৰ তেখেত এজন আগৰণুৱা যুঁজাৰু আছিল। ১৯১৮ চনত কটন কলেজ ছাত্ৰ সন্থাৰ প্ৰধান সম্পাদক আৰু ১৯১৯ চনত অসম ছাত্ৰ সন্থাৰ সন্মিলনৰ সাধাৰণ সম্পাদক হিচাপে নিৰ্বাচিত হৈছিল। অসহযোগ আন্দোলনত সক্ৰিয় অংশগ্ৰহণ কৰি ১৯২১ চনত ৫ মাহ সশ্ৰম কাৰাদণ্ডৰে দণ্ডিত হৈছিল। ১৯২২ চনত অসম প্ৰাদেশিক কংগ্ৰেছৰ সম্পাদক হিচাপে দায়িত্বভাৰ গ্ৰহণ কৰিছিল। ১৯৩০ চনত আইন অমান্য আন্দোলন আৰু ১৯৪২ৰ গণ আন্দোলনৰ গুৰি ধৰিছিল। তেজপুৰত শৈক্ষিক দিশটো উন্নয়নৰ হেতু তেজপুৰ একাডেমী তেখেতৰ একান্ত প্ৰচেষ্টাত প্ৰতিষ্ঠা কৰা হৈছিল। ১৯৪৫ চনৰ ১১ আগষ্টত গুৱাহাটীত মৃত্যু হয়।

সাহিত্য কৰ্ম

বাঁহী আলোচনীত বিভিন্ন প্ৰবন্ধ আদি লিখাৰ উপৰি ‘কংগ্ৰেছ বুৰঞ্জী’, ‘বিলাতত মহাত্মা’ আদি গ্ৰন্থ ৰচনা কৰিছিল।

সন্মান

হেমচন্দ্ৰ বৰুৱাই অসমীয়া সমাজ জীৱনত আগবঢ়াই যোৱা সমাজ সেৱাৰ বাবে তেওঁক ত্যাগবীৰ উপাধিৰে বিভূষিত কৰা হৈছিল। তেজপুৰৰ চহৰৰ মাজমজিয়াত থকা সদৰ থানাৰ সন্মুখত তেখেতৰ নামত "হেম ভৱন" বা "হেম বৰুৱা হল" স্থাপন কৰা হৈছে। এই ভৱনৰ সন্মুখতে তেখেতৰ এটা আৱক্ষ মূৰ্ত্তিও স্থাপন কৰা হৈছে।

বাহ্যিক সংযোগ

• Assam in Indian Independence By Arun Bhattacharjee
• Quit India Movement In Assam By Anil Kumar Sharma