কালিৰাম মেধি

অসমীয়া ৱিকিপিডিয়াৰ পৰা
কালিৰাম মেধি
জন্ম অক্টোবৰ ১৮ , ১৮৮০
ৰামদিয়া গাঁও, কামৰূপ, অসম
মৃত্যু জানুৱাৰী ২৪ , ১৯৫৪ (৭৩ বছৰ)
পেচা সাহিত্যিক, ব্যাকৰণিক
ভাষা অসমীয়া
ৰাষ্ট্ৰীয়তা ভাৰতীয়
নাগৰিকত্ব  ভাৰত
শিক্ষা স্নাতকোত্তৰ
উল্লেখযোগ্য বঁটা বিষ্ণুপ্ৰিয়া দেৱী পুৰস্কাৰ (১৯০২)
ৰায়বাহাদুৰ অব আছাম (১৯৪৬)
দাম্পত্যসংগী স্বৰ্ণলতা ভূঞা
সন্তান সৌৰভ কুমাৰ চলিহা

কালিৰাম মেধি (ইংৰাজী: Kaliram Medhi; ১৮৮০-১৯৫৪)[1] এজন প্ৰসিদ্ধ অসমীয়া সাহিত্যিক আৰু ব্যাকৰণিক আছিল৷ পৌৰাণিক অসমীয়া সাহিত্যৰ বিজ্ঞানসন্মত পুথি সমালোচনাৰ ক্ষেত্ৰত তেখেত পথপ্ৰদৰ্শক আছিল। কালিৰাম মেধিয়ে ১৯০২ চনত বিষ্ণুপ্ৰিয়া দেৱী পুৰস্কাৰ আৰু ১৯৪৬ চনত ৰায়বাহাদুৰ অব আছাম খিতাপ লাভ কৰিছিল। গৱেষণা আৰু পাণ্ডিত্যৰ বাবে ১৯৪৩ চনত ত্ত্বনিধি উপাধি লাভ কৰিছিল।[2]

জন্ম আৰু শিক্ষা[সম্পাদনা কৰক]

১৮৮০ চনৰ ১৮ অক্টোবৰত কামৰূপ জিলাৰ ৰামদিয়া গাঁৱত কালিৰাম মেধিৰ জন্ম হয়। তেওঁৰ পিতৃৰ নাম ভূকলি মেধি আৰু মাতৃৰ নাম সোণতৰা আছিল। মেধি ডাঙৰীয়াই বৰপেটাৰ মোক্ষদা দাসৰ লগত বিবাহ পাশত আবদ্ধ হয়। মেধি ডাঙৰীয়াৰ প্ৰথমখন বিয়া কইনা নেদেখা ভেকোভাওঁনাহে আছিল। তেওঁ সেয়ে দ্বিতীয় বিবাহ কৰাইছিল। দ্বিতীয় গৰাকী পত্নীৰ পাঁচটা সন্তান আছিল। কিন্তু দ্বিতীয় গৰাকী পত্নীও অকাল মৃত্যু মুখত পৰাত পৰিস্থিতিৰ সন্মুখীন হৈ নগাঁৱৰ জিয়াৰী স্বৰ্ণলতা ভূঞাক বিয়া পাতিছিল। কালিৰাম মেধিয়ে প্ৰাথমিক শিক্ষা গাঁৱৰে এখন উচ্চ প্ৰাইমাৰী বিদ্যালয়ত গ্ৰহণ কৰিছিল। সেই সময়ত এই বিদ্যালয় খনক ছাত্ৰঘৰ বুলি জনা গৈছিল। ১৮৯১ চনত গুৱাহাটীৰ চৰকাৰী উচ্চ মাধ্যমিক বিদ্যালয়ত নাম ভৰ্তি কৰে। ১৮৯৭ চনত তেওঁসংস্কৃত বিষয়ত সৰ্ব্বোচ্চ নম্বৰ সহ প্ৰথম বিভাগত এণ্ট্ৰেস পৰীক্ষাত উৰ্ত্তীন হয়। ইয়াৰ পাছত তেওঁ কলিকতা চিটি মহাবিদ্যালয়ৰ পৰা এফ এ শ্ৰেণীত ভৰ্তি হয়। ১৮৯৯ চনত এই মহাবিদ্যালয়ৰ পৰাই প্ৰথম বিভাগত এফ এ উৰ্ত্তীণ হয় আৰু তাতেই স্নাতক শিক্ষা গ্ৰহণ কৰে। ১৯০২ চনত তেখেতে কলিকতা বিশ্ববিদ্যালয়ৰ পৰা সোণৰ পদকসহ পদাৰ্থ বিজ্ঞানত স্নাতকোত্তৰ উপাধি লাভ কৰে। সেই সময়ত স্নাতকোত্তৰ উপাধি লাভ কৰা মেধি আছিল তৃতীয় অসমীয়া ব্যক্তি।[1]

কৰ্মজীৱন[সম্পাদনা কৰক]

১৯০৪ চনত কালিৰাম মেধিয়ে গুৱাহাটীৰ ছেটলমেণ্ট কেম্পত মাটি হাকিম হিচাপে কৰ্মজীৱনৰ পাতনি মেলে। ১৯০৫ চনত কালিৰাম মেধিয়ে অসম প্ৰশাসনিক সেৱাত যোগদান কৰে। তেওঁ গোৱালপাৰাত থকা সময়ত চৰকাৰী কামতকৈও কলা-কৃষ্টি-সাহিত্যৰ কামতহে নিজকে বেছিকৈ নিয়োগ কৰিছিলআৰু ১৯৩৫ চনত উপায়ুক্ত হিচাপে অৱসৰ গ্ৰহণ কৰে যদিও পাছৰ দুবছৰ কালত (১৯৩৬-১৯৩৮চন) বিশেষ ভাবে তেওঁ নিযুক্তি পাইছিল। ১৯১৯ চনৰ ২৬ ডিচেম্বৰত বৰপেটাত বহা অসম সাহিত্য সভাৰ তৃতীয় অধিবেশনত কালিৰাম মেধিয়ে সভাপতিত্ব কৰিছিল[3]। ১৯১৮ চনৰ দ্বিতীয় সভাৰ অভ্যৰ্থনা সমিতিৰ উপদেষ্টা আছিল মেধি ডাঙৰীয়া। তাৰোপৰি ১৯৩৪ চনত মঙ্গলদৈত আনন্দচন্দ্ৰ আগৰৱালাৰ সভাপতিত্বত হোৱা অধিবেশনৰো প্ৰধান উদ্যোগী পুৰুষ আছিল মেধিদেৱ। অনুসন্ধান সমিতি আৰু সংগ্ৰহালয় সমিতিৰো তেওঁ বিশেষ দায়িত্ব বহন কৰিছিল।[2]

মৃত্যু[সম্পাদনা কৰক]

১৯৫৪ চনৰ ২৪ জানুৱাৰীৰ নিশা ১০ বজাত পাণবজাৰৰ নাথান পথত থকা নিজা বাসভৱনত কালিৰাম মেধিৰ মৃত্যু হয়৷[2]

সাহিত্যপঞ্জী[সম্পাদনা কৰক]

ধৰ্ম,শিক্ষা,অৰ্থনৈতিক সমস্যা,সমাজ সংস্কাৰ আদিৰ ক্ষেত্ৰত কালিৰাম মেধিৰ এক মুক্ত দৃষ্টিভংগী আছিল। ‘অসম বান্ধৱ’ আৰু ‘আলোচনী’ পত্ৰিকাত এইবোৰ বিষয়ত তেখেতৰ কেতবোৰ প্ৰৱন্ধও প্ৰকাশ পাইছিল। প্ৰৱন্ধসমূহত তেখেতৰ ভাষাৰ গঠন আৰু প্ৰকাশভংগী আছিল মন কৰিবলগীয়া। কিন্তু সাহিত্যৰ ক্ষেত্ৰখনত তেখেতৰ প্ৰথম উল্লেখযোগ্য অৱদান আছিল কবি হেম সৰস্বতীৰ কাব্য সমালোচনা। পৌৰাণিক অসমীয়া সাহিত্য সমালোচনাৰ দিশত এয়া আছিল প্ৰথম পদক্ষেপ। কালিৰাম মেধিৰ ইয়াৰ পিছৰ গ্ৰন্থ ‘অসমীয়া ব্যাকৰণ আৰু ভাষাতত্ব’ তেখেতৰ সাহিত্য-ব্যাকৰণৰ জ্ঞানৰ গভীৰতা আৰু কঠোৰ পৰিশ্ৰমৰ নিদৰ্শন। ইয়াৰ পিছত তেখেতে মহাপুৰুষ শ্ৰীমন্ত শংকৰদেৱৰ সিঁচৰতি হৈ থকা বাণীসমূহ গোটাই ‘মহাপুৰুষ শংকৰদেৱৰ বাণী’ নামৰ গ্ৰন্থ প্ৰকাশ কৰে। তেখেতৰ আন এখন উল্লেখযোগ্য গ্ৰন্থ আছিল ‘ষ্টাডিজ ইন দা বৈষ্ণৱ লিটাৰেচাৰ এণ্ড কালচাৰ অব আছাম’ (Studies in the Vaishnav Literature and Culture of Assam)৷ সম্পাদিত গ্ৰন্থ: অংকাৱলী৷[4]
কালিৰাম মেধি ‘অসম অনুসন্ধান সমিতি’ আৰু ‘অসম ৰাজ্যিক সংগ্ৰহালয়’ৰ লগত ওত:প্ৰোতভাৱে জড়িত আছিল। ১৯১৯ চনত তেখেত অসম সাহিত্য সভাৰ তৃতীয় অধিবেশনৰ সভাপতি নিৰ্বাচিত হয়৷

ৰচনা সংকলন

  1. অসমীয়া ভাষাৰ মূল (১৯১৮),
  2. অসমীয়া ব্যকৰণ আৰু ভাষাত্ত্ব (১৯৩৬),
  3. অঙ্কাৱলী ১ম ভাগ,
  4. প্ৰহ্লাদ চৰিত্ৰ (সম্পাঃ)(১৯১৩),
  5. মহাপুৰুষ শঙ্কৰদেৱৰ বাণী,
  6. অসমীয়া প্ৰাথমিক প্ৰাকৃতিক বিজ্ঞান,
  7. বীজগণিত,
  8. আসমীয়া নাট,
  9. হেলীৰ নেজাল তৰা,
  10. গৌৰৱ,
  11. লিখাৰ সজুলি,
  12. তপ,
  13. পৃথিৱী,
  14. সূৰ্য,

ৰচনা সংকলন (ইংৰাজী)

  1. The Kalitas,
  2. Brajavali Literature of Assam,
  3. Philosophic Aspects of the Assamese Brajavali Literature ,
  4. Origin of Assamese Drama,
  5. Studies in the Vaishnav Literature and Culture of Assam
  6. Assamese Grammar and Origin of the Assamese Language.

তথ্য সংগ্ৰহ[সম্পাদনা কৰক]

  1. 1.0 1.1 Dr. G. C. Sharma Thakur. "Remembering Pundit Kaliram Medhi". Assamtribune.com. http://www.assamtribune.com/scripts/details.asp?id=jan2409/edit3। আহৰণ কৰা হৈছে: 2013-05-05. 
  2. 2.0 2.1 2.2 ত্ৰিদিপ গোস্বামী. পদ্মনাথ গোহাঞি বৰুৱাৰ পৰা ৰংবং তেৰাঙলৈ. অনন্ত হাজৰিকা, বনলতা প্ৰকাশন. পৃষ্ঠা. ২২, ২৩. 
  3. ১৯১৭ চনৰ পৰা অসম সাহিত্য সভাৰ সভাপতিসকলৰ তালিকা অসম সাহিত্য সভাৰ ৱেবছাইট, আহৰণ: ১৮ নৱেম্বৰ, ২০১২।
  4. "অসমৰ গ্ৰন্থসম্ভাৰ - কালিৰাম মেধিৰ গ্ৰন্থসম্ভাৰ". http://booksofassam.com/author_detail.php?recordID=%E0%A6%95%E0%A6%BE%E0%A6%B2%E0%A6%BF%E0%A7%B0%E0%A6%BE%E0%A6%AE%20%E0%A6%AE%E0%A7%87%E0%A6%A7%E0%A6%BF। আহৰণ কৰা হৈছে: November 12, 2011.